चौधरी समूहले युरोपेली मुलुक सर्वियामा वाइवाइको प्लान्ट स्थापना गरेको छ । यससँगै वाइवाइ चाउचाउको उत्पादन अव युरोपबाट समेत हुने भएको छ। सो प्लान्टको निर्माण अन्तिम चरणमा पुगेको समूहले जानकारी दिएको छ । समूहले अमेरिकामा समेत प्लान्ट राख्ने बारेमा अध्ययन सुरु गरिसकेको छ।
सर्वियाका प्रधानमन्त्री अलेक्ज्याण्डर भुसिकले रुमा शहरमा रहेको रुम्स्का इन्डस्ट्रियल लुपमा प्लान्टको अवलोकन गरेको समूहले जानकारी दिएको छ । सो अवसरमा चौधरी समूहका अध्यक्ष विनोद चौधरी र समूहका प्रवन्ध निर्देशक निर्वाण चौधरीको सहभागिता थियो । उद्योगले पहिलो चरणमा करीब ४ सय तथा उत्पादन र वितरण शुरु हुँदासम्म १२ सयभन्दा बढीलाई रोजगारी प्रदान गर्ने समूहद्धारा जारी विज्ञप्तिमा उल्लेख छ।
‘वाइवाइलाई विश्वव्यापी रुपमा विस्तार गर्ने हाम्रो अभियान हो’ विज्ञप्तिमा भनिएको छ ‘ सोही क्रममा हामीले वाइवाइको विस्तार युरोपमा गरेका हौं ।’ सो भेटमा प्रधानमन्त्री भुसिकले सर्वियामा वाइवाइ प्लान्ट स्थापना गर्ने खुशीको कुरा भएको बताए । साथै विश्वव्यापी रुपमा सर्वियाको वैदेशिक लगानी विस्तारका लागि सहयोग गर्न समेत आग्रह गरे। हाल अमेरिकाका विभिन्न स्टोरहरुमा वाइवाइ चाउचाउ उपलब्ध हुने बताइएको छ ।
विश्वव्यापी रुपमा वार्षिक २ अर्ब २० करोड विक्री भैरहेको वाइवाइले विश्व तयारी चाउचाउ बजारको २.२ प्रतिशत हिस्सा ओगटेको छ । हाल नेपालमा ६ र भारतमा ८ प्लान्टमार्फत उत्पादन भइरहेको छ ।
वाइवाइले भारतीय तयारी चाउचाउ बजारमा २७ प्रतिशत हिस्सा ओगटेको छ । त्यस्तै बंगलादेश, केन्या र साउदी अरेवियामा पनि वाइवाइका स्थापनाको तयारी गरिरहेको छ।
