काठमाडौं । १४ औं हस्तकला व्यापार मेला तथा १२ औं हस्तकला प्रतियोगिता मंसिर १० गतेदेखि हुने भएको छ । काठमाडौंको भृकुटीमण्डपमा हुने मेला १४ गतेसम्म चल्ने छ ।
हस्तकला समृद्धिका सम्भावनाहरु नराका साथ आयोजना गर्न लागिएको मेलामा १ सय ७६ स्टल रहनेछन् । जसमध्ये ७ ओटा प्याभिलियन र स्टलहरु बुकिङ भइसकेको आयोजकले जानकारी दिएको छ । हस्तकला क्षेत्रका सामानहरुको अन्तरराष्ट्रिय जगतमा प्रचारप्रसार गर्ने उद्देश्यका साथ मेला आयोजना गरिएको आयोजक नेपाल हस्तकला महासंघका अध्यक्ष धर्मराज शाक्यले जानकारी दिए ।
आइतवार एक पत्रकार सम्मेलन आयोजना गरी यस्तो जानकारी दिइएको हो । सो अवसरमा व्यापार प्रवद्र्धन तथा निकासी केन्द्रका इशवरीप्रसाद घिमिरेले मेला पहिलाको भन्दा फरक भएको जानकारी दिए । त्यस्तै पेभिलियनमा एनटिआइएस राख्न सुझाए ।
कार्यक्रममा वाणिज्य मन्त्रालयका सहसचिव तोयानारायण ज्ञवालीले सरकारले स्थानीय,केन्द्र तथा अन्तरराष्ट्रिय स्तरमा आयोजित मेलालाई सहयोग गर्ने गरेको बताए । मेलामा आधुनिक विधा तर्फ बुनाई र परम्परागत विधामा धातु पत्रकलामा संलग्न कलाकारहरुको जीवन्त प्रदर्शन अनुसार सम्मान गरिने बताइएको छ । जसमध्ये ३ जनालाई कलाकारलाई नगद पुरस्कार तथा प्रमाणपत्र दिने बताइएको छ ।
जसमध्ये प्रथक हुनेलाई ५० हजार,द्धितिय ३० हजार र तृतीय हुनेलाई २० हजार नगद पुरस्कारको व्यवस्था गरिएको छ । त्यस्तै यस बर्षको मेलामा हस्तकलाका विभिन्न वस्तुहरुका आगामी बर्ष को डिजाइन प्रक्षेपण गरी प्रदर्शनी गरिने छ । हस्तकला क्षेत्रको उत्कृष्ट उद्यमी चयन गरि सम्मान गरिने बताइएको छ । त्यस्तै क्रेता तथा विक्रेतावीच विटुवी बैठक आयोजना गरिने छ ।
त्यसैगरी नयाँ वस्तुहरुको उजागर तथा निर्यात योग्य वस्तु विकास गरी निर्यात प्रवद्र्धनमा सहयोग प’र्याउने उद्देश्यले मेलामा भाग लिने प्रदर्शनकर्ताहरुको उत्कृष्ट वस्तुलाई एकै स्थानमा प्रदर्शन गरिने छ । साथै मेलामा राखिएकामध्ये परम्परागत,टेक्सटाइल,होम डेकोरेशन र फेशन एसेसोरिजविधाबाट ३ उत्कृष्ट वस्तुलाई पुरस्कृत गरिने छ ।
आयोजकका अनुसार मेलामा चीन,इरान,युएई, भुटान,श्रीलंकालगायत देशबाट २० जना भन्दा बढी विदेशी आयातकर्ता आउनेछन् । मेलामा २ लाख अवलोकनकर्ता आउने आयोजकको अपेक्षा छ ।
साथै १० करोड भन्दा बढी को व्यापार हुने बताइएको छ । मेलाको उपराष्ट्रपतिबाट उद्दघाटनको कार्यक्रम छ । मेलामा अवलोकनका लागि ५० रुपैयाँ प्रवेश शुल्क तोकिएको छ । जसमा विद्यार्थीलाई ५० प्रतिशत छुट र अपांगहरुलाई निशुल्क प्रवेशको व्यवस्था रहेको संयोजक होमनाथ उपाध्ययाले जानकारी दिए ।