काठमाडौं । भुकम्पले तहसनहस बनाएको सुनचाँदी बजार विस्तारै तंग्रिन थालेको छ । गत बर्ष भन्दा सुनचाँदीको विक्री पनि बढेको सम्वन्धित व्यवसायीहरु बताउँछन् । त्यसमा पनि विवाहको सिजन नजिकिदै गर्दा स्थानीय बजारमा सुनको कारोवारमा पनि बृद्धि भएको हो । अन्य समयको तुलनामा सुन,चाँदीको विक्री करिव ६५ प्रतिशतले बढेको सम्वन्धीत व्यवसायीहरु बताउँछन् ।
तिहारमा सुन तथा चाँदी किन्ने प्रचलन भएकोले पनि विक्री बढेको नेपाल सुनचाँदी व्यवसायी महासंघका अध्यक्ष मणिरत्न शाक्यले जानकारी दिए । उनका अनुसार यो समयमा सुन भन्दा पनि चाँदीको विक्री बढी हुन्छ । अन्य समयमा दैनिक ३ सय किलो चाँदी विक्री हुने गरेकोमा अहिले १५ सय केजी पुगेको उनले बताए । ‘तिहारमा चाँदी किनेर राख्ने प्रचलन बढेकोले यसको विक्री बढ्ने गर्छ’ उनले भने ‘त्यसमा पनि धनतेरसको दिन सवैभन्दा बढी चाँदी विक्री हुने गरेको छ ।’
त्यस्तै विवाहको सिजन नजिकिएकोले पनि सुनको विक्री बढेको मेरिगोल्ड ज्वेलर्सकी प्रोप्राइटर ज्योत्सना श्रेष्ठले बताइन् ।
गत बर्षके तुलनामा बढेपनि सुनचाँदी व्यवसाय भुकम्प अघिको अवस्थामा भने पुग्न नसकेको अध्यक्ष शाक्यले बताए । भुकम्प अघि यो समयमा दैनिक ३० देखि ४० किलोसम्म सुन विक्री हुने गरेकोमा हाल २५ किलोसम्म हुने गरेको उनले जानकारी दिए । भुकम्पपछि विस्तारै बजार बढेपनि भुकम्प अघिको अवस्थमा नपुगेको उनले बताए ।
परम्परागत गहनामा आकर्षण
पछिल्लो समय पुरम्परागत गहनामा ग्राहकहरुको आकर्षण बढेको मेरिगोल्डकी प्रोप्राइटर श्रेष्ठले जानकारी दिइन् । ‘अचेल जन्तर, तिलहरी, सिरबन्दीलगायत पुानो डिजाइनको गहनाको माग बढी हुने गरेको छ ।’ यस्ता गहनामा विशेषगरी युवा पुस्ताको आकर्षण बढी हरेको उनले जानकारी दिइन् । युवा पुस्ताहरु परम्परागत गहनालाई नयाँ डिजाइन दिएर लगाउन रुचाउछन् ।
३ सयले ओरालो लाग्यो सुन ,चाँदीमा पनि गिरावट
बुधवार उकालो लागेको सुन बिहीवार पुन ओरालो लागेको छ । बुधवार ५६ हजार ८ सयमा किनबेच भएको सुन आज ५६ हजार ५ सयमा झरेको छ । त्यस्तै चाँदीको मूल्यमा पनि सामान्य गिरावट आएको छ । सो दिन चाँदी प्रतितोला ८ सय १० मा किनबेच भइरहेको छ ।
