काठमाडौं । चालु आर्थिक बर्ष २०८१/८२ को पहिलो दिन ‘मंगबार’ नेपाल स्टक एक्सचेन्ज (नेप्से) परिसुचक उच्च अंकले बढेको छ ।
कारोबार समयको सुरुवातिदेखि लगातार उकालो लागेको नेप्से अन्तिम समयमा ७०.१८ अंकले बढ्दै २३ सय १० को विन्दुमा उक्लेर बन्द भएको हाे । आज कारोबार अवधिभर ३ सय १५ कम्पनीका २ करोड ५८ लाख ३६ हजार बढी कित्ता सेयर १ लाख १९ हजार बढीपटक किनबेच हुँदा कारोबार रकम ९ अर्ब १३ करोड ८६ लाख २९ हजार रुपैयाँ पुगेको छ ।
आज नेप्सेमा हरियाली छाउँदा विभिन्न ९ कम्पनीको सेयरमूल्यमा सकारात्मक सर्किट लागेको छ । दिनभरको कारोबारमा म्युचुअल फण्डबाहेकका सबै समुहको परिसुचक उकालो लाग्दा २ सय ३४ कम्पनीको सेयरमुल्य बढेको देखिन्छ । आज जम्मा ८ कम्पनीको सेयरमुल्य मात्रै ओरालो लागेको नेप्सेले जानकारी दिएको छ ।
मंगलबार १४ कम्पनीको सेयर १० करोड बढीको कारोबार हुँदा सबैभन्दा बढी ङादी ग्रुप पावर लिमिटेडको २१ करोड ७७ लाख रुपैयाँ बराबरको सेयर कारोबार भएको छ ।
