काठमाडौं । दशैपछिको पहिलो दिन नेप्से परिसुचक १६ अंकभन्दा बढीले ओरालो लागेको छ । आइतबार बजार खुलेदेखि ओरालो लागेको नेप्से परिसुचक अन्तत १६ दशमलव १४ अंकले घट्दै १ हजार ८ सय ३ दशमलव ७४ अंकमा झरेर अडिएको छ ।
बजारमा सवै समुहको परिसुचक ओरालो लागेका छन् । जसमध्ये सवैभन्दा बढी बीमा समुहको परिसुचक ८१ अंकले घटेको छ भने होटल समुह पनि ७२ अंकले घट्न गएको छ । यसैगरी बजारमा सवैभन्दा बढी प्रभाव पार्ने बैंकिङ समुहको परिसुचक पनि १५ अंकभन्दा बढीले ओरालो लागेको छ ।
आइतबार विकास बैंक समुह ९ दशमलव ६८ अंकले ओरालो लाग्दा फाइनान्स समुहको परिसुचक भने ५ अंकले घटेको छ ।
बजारमा कारोवार रकम पनि खासै बढ्न सकेन । आइतबार बजारमा बजार ६० करोड रुपैयाँको कारोवार हुँदै बन्द भएको छ । दिनभर कुल १ सय २२ कम्पनीको ७ लाख ६७ हजार कित्ता सेयर मात्र खरिदविक्री भएको छ ।
आइतबार सवैभन्दा बढी कुमारी बैंकको सेयर कारोवार भएको छ । कुमारीको १७ करोड ८० लाख रुपैयाँ बरावरको सेयर खरिदविक्री हुँदा अन्य कम्पनीको भने ५ करोड रुपैयाँभन्दा माथी जान सकेन ।
