काठमाडौं । नेपाल धितोपत्र बोर्डले ब्रोकर कमिशन घटाउने निर्णय गरेको छ । बोर्डको आईतबार बसेको संचालक समितिको बैंठकले ब्रोकरको कमिशन घटाउने निर्णय गरेको हो ।
बोर्डले यसअघि अध्ययन गरेर ब्रोकर र धितोपत्र बोर्डले लिँदै आएको सेयर कारोबारको कमिशन घटाउन अर्थ मन्त्रालयमा पठाएको थियो । तर अर्थमन्त्री वर्षमान पुनले लगानीकर्ताको हित भन्दा पनि सरकारी कमिशन घटाउँदा राजस्वमा असर पर्ने भन्दै ब्रोकरको मात्र कमिशन घटाउन स्वीकृति दिएका थिए । सोही अनुरुप बोर्डका अध्यक्ष रितेश शाक्यको अध्यक्षतामा बसेको बैंठकले बैंठकले जेठ १ गतेदेखि लागू गर्नेगरी ब्रोकर कमिशन घटाउने निर्णय गरेको हो ।
बोर्डको गत कार्तिक १ गते बसेको सञ्चालक समिति बैठकले मौजुदा ब्रोकर कमिशन देखि धितोपत्र बोर्डको कमिशनमा समेत १० प्रतिशतका दरले घटाउने गरी अर्थ मन्त्रालयमा प्रस्ताव गरेको थियो । हाल सेयर कारोबारमा अधिकतम ब्रोकर कमिशनको माथिल्लो सीमा ०.४० प्रतिशत र तल्लो सीमा ०.२७ प्रतिशत कमिशन लाग्दै आएको छ । तर अर्थ मन्त्रालयको स्वीकृतिमा बोर्डको आईतबार बसेको संचालक समितिले गरेको निर्णय अनुसार अब माथिल्लो सीमालाई ०.३६ प्रतिशत र तल्लो सीमालाई ०.२४ प्रतिशतमा झारिएको छ ।
हाल ५० हजार रुपैयाँसम्मको कारोबारमा लगानीकर्ताले ०.४० प्रतिशत, ५० हजार देखि पाँच लाख रुपैयाँसम्मको कारोबारमा ०.३७ प्रतिशत, पाँच लाखदेखि २० लाख रुपैयाँसम्मको कारोबारमा ०.३४ प्रतिशत कमिसन शुल्क तोकिएको छ । त्यस्तै, २० लाखदेखि एक करोड रुपैयाँसम्ममा ०.३० प्रतिशत र एक करोड रुपैयाँमाथि ०.२७ प्रतिशतसम्म कमिसन लाग्दै आएको छ । अर्थमन्त्रालयले बोर्डको प्रस्ताव स्वीकृत गरेसँगै अब ५० हजार रुपैयाँसम्मको कारोबारमा लगानीकर्ताले ०.३६ प्रतिशत, ५० हजारदेखि ५ लाख रुपैयाँसम्मको कारोबारमा ०.३३ प्रतिशत, पाँच लाखदेखि २० लाख रुपैयाँसम्मको कारोबारमा ०३०६ प्रतिशत कमिशन शुल्क लाग्ने भएको छ । यस्तै २० लाखदेखि एक करोड रुपैयाँसम्ममा ०.२७ प्रतिशत र १ करोड रुपैयाँभन्दा माथिको कारोबारमा ०.२४ प्रतिशतसम्म कमिशन लाग्नेछ ।
आईतबार बसेको बोर्ड बैंठकले अर्थ मन्त्रालयबाट गएको प्रस्तावलाई पारित गरेपनि माईन्युटमा संचालकहरुले भने हस्ताक्षर गरिसकेका छैनन् । उक्त माईन्युटमा संचालकहरुले हस्ताक्षर गरिसकेपछि मात्रै घटेको ब्रोकर कमिशनदर कार्यान्वयनमा आउने बोर्ड स्रोतले जानकारी दिएको छ ।
