काठमाडौं । सरकारले स्थानीय तहको पैसा निक्षेपमा गणना गर्न दिने भएपछि सेयर बजारमा उत्साह देखिएको छ । साताको दोस्रो कारोबार दिन सोमबार सेयर बजारमा मापन नेप्से परिसूचक ४४.३० अंकले बढेर १९६८.९९ बिन्दुमा उक्लिएको छ । आईतबार पनि नेप्से १० अंकले बढेको थियो । यस अघीका दिनहरुमा भने नेप्से सूचक घटिरहेको थियो । आज नेप्से सूचक समग्रमा २.२८ प्रतिशतले बढेको हो ।
यसैगरी, सोमबार कारोबार रकम पनि साढे १ अर्बभन्दा माथि पुगेको छ । सोमबार २७८ वटा कम्पनीको ४७ लाख ४२ हजार ५ सय ११ कित्ता सेयर किनबेच हुँदा १ अर्ब ५१ करोड ८३ लाख ४३ हजार ३ ९७ रुपैयाँको कारोबार भएको छ ।
सोमबार कारोबारमा आएको चार कम्पनीको सेयर मूल्य सकारात्मक सर्किट लेभलमा पुगेको छ । कारोबारमा आएको ११२ कम्पनीको सेयर मूल्य बढेको छ । यता ११ कम्पनीको सेयर मूल्य केहि घटेको छ भने, बाँकी पाँच कम्पनीको सेयर मूल्य यथावत रहेको छ ।
अर्थमन्त्रालयले शुक्रबार राष्ट्र बैंकलाई स्थानीय तहको सञ्चिति कोषको रकम बैंकहरुलाई निक्षेपमा गणना गर्न दिन पत्र पठाएको थियो । स्थानीय तहको पैसा बजार आउँदा आगामी दिनमा ब्याजदर नबढ्ने र सहज रुपमा कर्जा पाइने भएपछि सेयर बजारतर्फ लगानीकर्ताको आर्कषण देखिएको हो ।
सोमबार कारोबारमा आएको १३ वटै उपसमुहको सेयर मूल्य बढेको छ । यसैगरी , आज सबैभन्दा धेरै साल्ट ट्रेडिङ कम्पनीको सेयर खरिद बिक्री भएको छ ।
