काठमाडौं । नेपाल धितोपत्र बोर्डले घोराही सिमेन्टको रोक्का राखेको आइपीओ निष्काशन खुला गरेको छ । बोर्डले असार ४ गते कम्पनीको आइपीओ निष्काशनमा त्रुटी फेला परेको भन्दै निष्काशन नै स्थगित गरेको थियो । तर, असार मसान्त आईसकेको र वैदेशिक रोजगारीमा गएका नेपाली र उद्योग प्रभावित क्षेत्रका बासीन्दाको २९ करोड ४६ लाख ७८ हजार २ सय र सर्वसाधारणको ३ अर्ब ६१ करोड रुपैयाँ कम्पनीको खातामै रोक्का रहेकाले पुनः आइपीओ निष्काशन जारी गर्ने अनुमति दिएको हो ।
बोर्डका अनुसार कम्पनीको खातामै आइपीओ निष्काशन वापतको रकम रकमान्तर भईसकेको र हालसम्म उक्त निष्काशन नै रोक्का राख्दा सर्वसाधारको पैसा नै रोक्का हुने अवस्था आएपछि निष्काशन खुला गरिएको हो ।
यसपश्चात कम्पनीले सिआस्वामा दर्ता भएका आवेदनकर्ताको आवेदन अनुसार सेयर कित्ता थपघट गर्न, खारेज वा फिर्ता गर्न सक्ने भएको छ । यस्तै यस्तो आवेदन फिर्ता वा थपघट गर्न विक्री प्रवन्धकले तीन दिनको समय दिने बताईएको छ ।
यस्तै बोर्डले कम्पनीको जारी गरेको कुल आइपीओमध्ये आवेदनको समयभित्र सबै कित्ता विक्री नभएमा थप सात दिनको समय पाउनेसमेत निर्णय गरिदिएको छ । यसअघि घोराही सिमेन्टको आइपीओमा खातामा पर्याप्त रुपैयाँ नभई पनि लाखौं बराबरको आइपीओ खरिद गरीएको पाईएको थियो ।
उक्त आइपीओ आवेदनकर्ता भने घोराही सिमेन्टसँग सम्बन्धित नरहेको पाईएको बोर्डले जानकारी दिएको छ । यस बिषयमा थप अनुसन्धान हुने बोर्डले बताएको छ । तर, बढी आवेदन दिने लगानीकर्ताको अनुसन्धान गर्ने जिम्मा भने प्रहरीलाई दिने बोर्डले जानकारी दिएको छ ।
