बिजखबर संवाददाता
२९ मंसिर, काठमाडौं । आइतबार उच्च रुपमा बढेको नेप्से परिसुचक सोमबार सामान्य रुपमा मात्र बढेको छ । बजार खुलेपछि ओरालो लागेको परिसुचक अन्तमा युटर्न गरेर १ दशमलव ८८ अंकले मात्र बढेको छ । सोमबार नेप्सेपरिसुचक ९ सय ११ दशमलव ८९ विन्दुमा पुगेर अडिएको छ ।
सोमबार बजारमा कुनै पनि समुहको परिसुचक २० अंकभन्दा माथी बढ्न सकेन । बजारमा सवैभन्दा बढी होटल समुहको परिसुचक १७ दशमलव ७५ अंकले बढेको छ । यसैगरी, जलविद्युत् समुहको परिसुचक ६ दशमलव १९ अंकले बढेको छ भने बैंकिङ समुहको परिसुचक ५ दशमलव ४७ अंकले बढेको छ ।
बजार बन्द हुने बेलामा बैंकिङ समुहको परिसुचक बढेपनि समग्र नेप्से परिसुचक पनि केही उकालो लागेको हो । बजारमा बीमा, विकास बंक र अन्य समुहको परिसुचक भने ओरालो लागेको छ ।
सोमबार बजारमा कुल ३५ करोड ७२ लाख रुपैयाँ बरावरको ८ लाख हजार कित्ता सेयर कारोवार भएको छ । आइतबार सेयरको मुल्य बढेकाले सोमबार बजारमा अघिल्ला दिनको तुलनामा कारोवार बढी भएको ब्रोकरहरु बताउँछन् ।
