काठमाडौं । अटो व्यवसायीहरुले आन्दोलनका कार्यक्रम सार्वजनिक गरेका छन् । शुक्रबार नेपाल उद्योग वाणिज्य महासंघ (एफएनसीसीआई)को सचिवालयमा एक कार्यक्रमको आयोजना गर्दै नाडा अटोमोबाईल्स एसोसिएसनले विरोध कार्यक्रमको घोषणा गरेको हो ।
पछिल्लो समय नेपालको अटो क्षेत्र धराशायी हुँदै गएको र यसमा सरकारले ध्यान नदिएपछि विरोधका कार्यक्रम नै सार्वजनिक गर्नुपर्ने अवस्था आएको नाडाका अध्यक्ष ध्रुव थापाले बताए । उनका अनुसार गाडी आयातमा शतप्रतिशत र ५० प्रतिशत नगद मार्जिनको व्यवस्था, चालुपूँजी कर्जा मार्गदर्शनलगायतका व्यवस्थाले अटो व्यवसायीहरु ठुलो मारमा परेका छन् । कुल राजस्वमा करिव २१ प्रतिशत योगदान दिने अटो क्षेत्र पछिल्लो ८ महिनादेखि बन्दप्राय रहेको उनको भनाई थियो ।
यसमाथि सरकारले कुनै ध्यान नदिँदा हालसम्म ५८ ओटा डिलर बन्द भईसकेको उनले बताएका छन् । यस्तै नाडाका अनुसार नेपालमा अटो क्षेत्रले करिव १ लाख जनालाई रोजगारी दिएकोमा सरकारी नीतिकै कारण ३० प्रतिशत रोजगारी नै कटौति गर्नुपरेको छ ।
अटो व्यवसायीहरुले सरकारले गाडी आयातमा ५० प्रतिशत र पार्ट्स आयातमा १ सय प्रतिशत नगद मार्जिन राख्नुपर्ने व्यवस्था हटाउनुपर्ने, चालु पूँजी कर्जा मार्गदर्शन खारेज गर्नुपर्ने, व्याजदरमा नियन्त्रण गर्नुपर्ने, मौद्रिक नीति नै संशोधन गर्नुपर्नेलगायतका मागहरु राखेका छन् ।
हालसम्म सरकारले यस्ता मागहरुमा कुनै सम्बोधन नगरेकाले बाध्य भएर आन्दोलनका कार्यक्रमहरुको घोषणा गर्नुपरेको नाडाका अध्यक्ष थापाको भनाई थियो । यस अन्तर्गत आगामी २२ गते सम्पूर्ण व्यवसायीले कालो पहिरन लगाई ११ बजेदेखि २ बजेसम्म माइतीघर मण्डलामा धर्ना दिने योजना छ । यो दिन सातै प्रदेशमा यस्तो विरोधको कार्यक्रम हुने नाडाको भनाई छ ।
