काठमाडौं । यातायात व्यवस्था विभागले नयाँ मास प्रिन्टर खरिदका लागि टेन्डर आह्वान गरेको छ । विभागले यो आर्थिक बर्षको बार्षिक कार्यक्रम अन्तर्गत नै नयाँ मास प्रिन्टर ल्याउन लागेको हो । आगामी मंसिर २८ गतेसम्म आवेदन दिन सकिने उक्त टेण्डरमा एउटै प्रक्रियामार्फत २ ओटा सिल गरिएको खाममा आवेदन दिनु पर्नेछ । एउटा खाममा प्राविधिक तथा अन्य बीड राख्नुपर्नेछ भने अर्काेमा मूल्यको बारेमा राख्नुपर्ने विभागले जानकारी दिएको छ ।
पछिल्लो समय सवारी चालकको संख्या बढ्दै गएपछि अनुमतिपत्र बनाउनेको संख्या पनि त्यत्तिकै मात्रामा बढेको छ । तर, विभागले भने सवारीचालकलाई मागबमोजिम स्मार्टकार्ड लाइसेन्स उपलब्ध गराउन सकेको छैन ।
हाल विभागसँग भएको एउटा मात्रै मास प्रिन्टरमार्फत प्रतिदिन ४ हजारदेखि ४५ सयसम्म स्मार्टकार्ड लाइसेन्स छपाई हुन्छ । तर, लाइसेन्सको दैनिक माग भने करिव ९ हजारसम्म छ । यसको ग्याप परिपूर्ति गर्न विभागले नयाँ मास प्रिन्टरका लागि टेन्डर आह्वान गरेको विभागका सूचना अधिकारी ईश्वरीदत्त पनेरुले जानकारी दिए । ‘हाल हामीले छाप्ने लाइसेन्सभन्दा माग दोब्बरले बढी छ जसको कारण हो मेसिनको कमी,’ उनले भने, ‘अब नयाँ मेसिन ल्याएपछि त्यसमा सहजीकरण हुने अनुमान गरिएको छ ।’
यसअघि गत साउनमा नेपाल भित्र्याईएको मास प्रिन्टर ईटालीको माटिका कम्पनीमार्फत ल्याईएको हो । हाल उक्त प्रिन्टरले भनेबमोजिम नै काम गरिरहँदा पनि मागअनुसार लाइसेन्स छाप्न सकिएको छैन । सरकारले नै मागबमोजिम स्मार्ट लाइसेन्स छाप्न प्रिन्टर खरिद गर्नेगरी बजेट भाषणमार्फत नै १० करोड रुपैयाँ छुट्याएको छ । यसमा आवेदन दिने कम्पनीले सेक्युरिटीका लागि भन्दै २३ लाख रुपैयाँ जम्मा गर्नुपर्ने यातायात व्यवस्था विभागले जानकारी दिएको छ ।
गत बर्ष फ्रान्सेली कम्पनीले नेपाल ल्याएको १४ लाख स्मार्टकार्ड छपाई गरेर वितरणको अन्तिम चरणमा छन् । विभागले पुनः १२ लाख स्मार्टकार्ड ल्याउनेगरी टेन्डर आह्वान गरी त्यसको प्राविधिक विश्लेषण गरिरहेको छ । यसरी आएका स्मार्टकार्ड लाई लाइसेन्सका रुपमा प्रिन्ट गरेर विभागले यातायात कार्यालयहरुमा पुर्याउँछ ।
