काठमाडौं । हाम्रो पात्रो रेमिटले नेपाल क्लियरिङ हाउस (एनसीएचएल) सँग सम्झौता गरेको छ । हाम्रो पात्रोले नेशनल पेमेन्ट स्वीच (एनपीएस)को प्राविधिक सदस्यको रुपमा जोडिई नेपाल भित्र सेवाग्राहीलाई रेमिटेन्सको भुक्तानीहरु गर्न सम्झौता गरेको हो । सम्झौता पत्रमा हाम्रो पात्रो रेमिटका तर्फबाट संस्थाका प्रमुख कार्यकारी अधिकृत सुदिना गौतम र एनसीएचएलका तर्फबाट संस्थाका प्रमुख कार्यकारी अधिकृत नीलेश मान सिंह प्रधानले हस्ताक्षर गरेका छन् ।
उक्त सम्झौता पश्चात हाम्रो पात्रो रेमिटको आन्तरिक भुक्तानी प्रणालीलाई एनसीएचएलको नेशनल पेमेन्ट इन्टरफेससँग जोडी एनपीएस अन्तर्गतको विभिन्न भुक्तानी उपकरणहरु प्रयोग गरी रेमिटले स्वचालित रुपमा भुक्तानी कारोबारहरु गर्न सक्नेछन् । हाम्रो पात्रो रेमिटको सेटल्मेन्ट बैंक नेपाल इन्भेष्टमेन्ट बैंक लिमिटेड रहेको छ र यस व्यवस्था अनुसार रेमिटले सम्पूर्ण भुक्तानी कारोबारहरु सोझै लाभग्राहीको बैंक खातामा जम्मा गरिनेछ र चाँडै नै अन्य विभिन्न उपकरणहरू मार्फत पनि उक्तसेवा उपलब्ध गरिनेछ ।
हाम्रो पात्रो रेमिट नेपाल राष्ट्र बैंकबाट अनुमती प्राप्त पूर्णतः डिजिटल रेमिटेन्स कम्पनी हो । हाल यसका सेवा अमेरिका बाट नेपालमा गरिने रेमिटेन्ससञ्चालनमा रहेको छ भने चाँडै अन्य देशहरुमा पनि सेवा विस्तार गरिने छ । हाम्रो पात्रो नेपालको सबैभन्दा बढी डाउनलोड गरिएको एप हो र विदेशमा रहेका नेपालीहरूले व्यापक रूपमा प्रयोग गर्दै आएका छन् । हाम्रो पात्रोको विस्तारित सेवाको रूपमा हाम्रो पात्रो रेमिटको यस सेवाले लाभग्राहीहरूको खातामा छिटो भन्दा छिटो रकम जम्मा गर्नुका साथै नेपाल भित्रको डिजिटल रेमिटेन्सको कारोबारलाई थप सहज बनाउने अपेक्षा गरिएको छ ।
