काठमाडौं । सुजुकी मोटरले आफ्नो ३० औं शाखा ललितपुरको बालकुमारीमा खोलेको छ । सुजुकीको नेपालका लागि आधिकारीक विक्रेता एआईटी सीजी मोटोकोर्पले नारायणी अटो विजनेशको सहकार्यमा उक्त शाखा खोलेको हो ।
शाखा उद्घाटन कार्यक्रममा सीजी माटोकोर्पका प्रवन्ध निर्देशक अरुणकुमार चौधरीले आगामी दिनमा सुजुकीले ठूला खालका प्यासेन्जर्स भेइकल भित्र्याउन लागेको जानकारी दिए । ‘हाल सुजुकीले साना खालका प्यासेन्जर्स मेइकलमात्र विक्री गर्दै आएकोमा केही समयभित्रै ठूला खालका भिट्रा र बलेनो गाडी नेपाली बजारमा भित्र्याउन लागेको छ,’ उनले भने, ‘आगामी २ वर्षभित्र विभिन्न खालका ६ नयाँ मोडल नेपाली बजारमा ल्याउने छ ।’
आजभन्दा ३० वर्ष अघि शुरु गरेको मोटर व्यवसाय यो अवस्थामा आइपुग्दा खुशी लागेको चौधरीले जानकारी दिए । ‘कुनै पनि व्यवसाय गर्न त्यसप्रतिको लगाव र इच्छाशक्ति चान्हिन्छ,’ उनले भने, ‘आफुलाई व्यापार व्यवसायसँग जोड्न सकियो भने मात्र सफल हुन सकिन्छ ।’
कार्यक्रममा नेपाल अटोमोवाइल डिलर्श एशोसिएशनका महासचिव कृष्णप्रसाद दुलालले देशको राजस्वमा २५ प्रतिशतभन्दा बढी योगदान दिँदै आएको व्यवसायलाई अझ बढी फराकिलो पारिनु पर्ने बताए । ‘३ करोड जनसंख्या रहेको नेपालमा १ प्रतिशत जनताले पनि चारपाङग्रे सवारीसाधन चढ्दैनन,’ उनले भने, ‘देश विकासको लागि पूर्वाधार तथा यातायातको विकास आवश्यक छ ।’
कार्यक्रममा नारायणी अटो विजनेशका प्रमुख कार्यकारी अघिकृत अनुप बरालले उक्त शो रुममा हाल सेल्सको मात्र व्यवस्था रहेको र छिट्टै नै सर्भिस सेन्टरको पनि व्यवस्था गरिने जानकारी दिए । ‘सवारीसाधन विक्री गर्नु भनेको लाइफ स्टाइल विक्री हो,’ उनले भने, ‘तसर्थ शोरुमले नयाँ नयाँ प्रविधि र सुविधा थप्दै जाने छ ।’
सन् २०१० मा स्थापित नारायणी विजनेशले टाटा मोटरका उत्पादन विक्री गर्दै आएको थियो । हाल टाटा मोटर छाडेर सुजुकीको डिरल लिएको कम्पनीका सीईओ बरालले जानकारी दिए ।
शाखा उद्घाटनको अवसरमा नारायणी अटोले गाडी खरिद गर्न चाहनेका लागि २० हजार छुट प्रदान गरेको थियो । सो अवसरमा ७ जनाले गाडी खरिद गरेको कम्पनीले जानकारी दिएको छ । सुजुकीको वालकुमारीस्थित नयाँ शाखामा विभिन्न २५ मोडलमा गाडीहरु उपलब्ध छन् ।
