काठमाडौं । सरकारले पेट्रोलियम पदार्थको मूल्य बढेको भन्दै लामो दुरीका सार्वजनिक सवारीसाधनको भाडा बढाएको छ । यातायात व्यवस्था विभागले शुक्रबार एक सूचना जारी गर्दै लामो दुरीमा चल्ने यात्रुबाहक र मालवाहक सवारीसाधनको भाडादर वृद्धि गरेको हो ।
विभागका अनुसार बिहीबार रातिदेखि लागु हुनेगरी डिजेलको मूल्य १ सय ६५ रुपैयाँ पुगेपछि गाडी भाडा पनि बढाईएको हो । विभागले सार्वजनिक सवारीसाधनको भाडा स्वचालित मूल्य समायोजन प्रणालीअनुसार बढेको जानकारी दिएको छ । उक्त प्रणाली अनुसार पेट्रोलियम पदार्थको मूल्य ५ प्रतिशतभन्दा बढीले घटबढ भएको खण्डमा सार्वजनिक सवारीसाधनको भाडा पनि सोही अनुसार समायोजन हुने व्यवस्था छ ।
नेपाल आयल निगमले बिहीबार राति १२ बजेदेखि लागु हुने गरी पेट्रोलको मूल्य प्रतिलिटर ८ र डिजेलको मूल्य प्रतिलिटर १२ रुपैयाँले बढाएको हो । यससँगै आजैदेखि लागु हुनेगरी यात्रुवाहक सवारीसाधनको हालको भाडादरमा २.५ प्रतिशतको वृद्धि भएको छ भने पहाडी बाटोमा चल्न मालवाहक सवारीसाधनको भाडादर ३.३ प्रतिशतले वृद्धि भएको छ ।
यस्तै तराईको बाटोमा चल्ने मालवाहक सवारीसाधनको भाडा साविकको भाडादरमा ३.७ प्रतिशतले वृद्धि भएको बताईएको छ । डिजेलको मूल्य बिहीबार रातिदेखि साविकको तुलनामा ७.८४ प्रतिशतले वृद्धि भएको हो ।
