काठमाडौं । नेपाल राष्ट्रिय उद्योग व्यवसाय महासंघको अध्यक्षमा एलपी सावाँ लिम्बु निर्वाचित भएका छन् । महासंघको काठमाडौंमा जारी दोस्रो महाधिवेशनले लिम्बुलाई सर्वसम्मत रुपमा अध्यक्षमा चयन गरेको हो ।नेकपा एमाले समर्थित उद्योगी व्यवसायीहरुको देशभरबाट उपस्थित १ हजारभन्दा बढि प्रतिनिधिले लिम्बुको अध्यक्षतामा सर्वसम्मत रुपमा १७ पदाधिकारी सहित २५५ सदस्यीय केन्द्रिय कमिटि चयन गरेको हो । जसमा ६ जना उपाध्यक्षहरु, १ जना महासचिव, २ जना उपमहासचिव, ५ जना सचिव र १ जना कोषाध्यक्ष चयन गरेको हो ।
उपाध्यक्षहरुमा रामबहादुर गुरुङ, डेकनाथ गौतम, डिबी बस्नेत, सिएन पाण्डे, बालकृष्ण शिवाकोटी, सुर्यबहादुर थापा र डा. तिलचन्द्र भट्टराई चयन भएका छन भने महासचिवमा भगिरथ सापकोटा, उपमहासचिवहरुमा सुवर्ण श्रेष्ठ र मिनबहादुर तामाङ तथा सचिवहरुमा रघु पुरी, केदारवहादुर बस्नेत, मोति ज्ञवाली, बलराम भट्टराई र खड्गबहादुर खत्री रहेको छन् । यसैगरी कोषाध्यक्षमा मोहन डाँगी निर्वाचित भएका हुन् । यसैगरी उक्त महाधिवेशनले लेखा समिति संयोजकमा डिमप्रकाश पौडेल, निर्वाचन आयोगको संयोजकमा निरज राई र अनुशासन आयोगको संयोजक समेत चयन गरेको छ ।
यसैगरी उक्त महाधिवेशनले १६ बुँदे काठमाडौं घोषणापत्र समेत जारी गरेको छ । विश्व्यापी महामारीका कारण थलिएको अर्थतन्त्रलाई राहत प्रदानगरि उकास्ने काममा सरकारको उदासिनता भएको भन्दै खेद प्रकट गरेको छ । साथै महामारीका कारण अति प्रभावित पर्यटन व्यवसाय, निर्माण, यातायात लगायत उद्योग व्यवसाय क्षेत्रका निमित्त प्रवाह गरिएको ऋण पुनःसंरचना गरि ५ वर्षको लागि सहुलियत पुर्नकर्जा प्रदान गर्न समेत माग गरेको छ ।
साथै अर्थतन्त्र धरासायी हुन लागेको अवस्थामा वर्तमान सरकार भ्रष्टाचारमा व्याप्त हुनुका साथै अनियमितता ढिलासुस्ती र दण्डहिनतामा लागेको भन्दै त्यसको अन्त्यको लागि माग गरेको छ ।
औद्योगिक कच्चापदार्थ लगायत दैनिक उपभोग्य सामानहरु दिन दुइगुना रात चौगुनाको दरले महंगीका कारण सामान्य जनजीवनमा समस्या पर्न गएको र त्यस्ता समस्या समाधान गर्न सरकार गैर जिम्मेवार भएको आरोप लगाएको छ । साथै पूँजीगत खर्च हुन नसकेका कारण तरलता अभाव भएको भन्दै तत्काल सम्बोधन गर्न माग गरेको छ । पछिल्लो समय उद्योग व्यवसाय स्थापना र संचालन गर्न उद्योगी व्यवसायीले प्रशासनिक सास्ती खेप्नु परेको भन्दै व्यवसायी माथि देखिएको नैराश्यता अन्त्यगरी एकद्वार प्रणाली लागू गर्न माग गरेको छ ।
साथै हालै प्रधानमन्त्री शेरबहादुर देउवाको भारत भ्रमणका बेला दुईपक्षिय आर्थिक क्षेत्रका समस्या समाधान गर्न तर्फ ध्यान नदिई राष्ट्रियता र स्वाभिमानमा आँच आउने काम गरेको भन्दै खेद प्रकट गरेको छ ।
