चीनको विशेष प्रशासनिक क्षेत्रको रुपमा रहेको हङकङ् विश्वमा सबैभन्दा धेरै धनीहरु बस्ने सहरको रुपमा पहिलो स्थानमा परेको छ । यसअघि यो सूचीमा नियमित पहिलो स्थानमा रहेको न्यूयोर्कलाई पछि पार्दै हङकङ धनीहरुको सहर बनेको हो ।
विश्वका धनी व्यक्ति बस्ने ठाउँको सुची तयार गर्ने वेल्थ एक्सले सार्वजनिक गरेको सन् २०१७ को ‘वर्ल्ड अल्ट्रा हेल्थ’ प्रतिवेदनले हङकङ्लाई पहिलो स्थानमा दर्ज गरेको हो । प्रतिवेदन अनुसार विश्वभर करिब तीन अर्ब रुपैयाँभन्दा बढी सम्पत्ति भएका व्यक्तिको सङ्ख्या दुई लाख ५५ हजार ८ सय १० पुगेको छ । त्यसमध्य हङकङ्मा मात्रै १० हजारभन्दा बढी व्यक्ति रहेका छन् । दोस्रो स्थानमा रहेको न्यूयोर्कमा यस्तो सम्पत्ति रहेका व्यक्तिको सङ्ख्या ८ हजार ९ सय छ ।
प्रतिवेदनले विश्वमा सम्पत्ति आर्जनको प्रवृत्ति अमेरिकाबाट एसियातर्फ स्थानान्तरण भएको पनि देखाएको छ । विश्वका १९ प्रतिशत धनी व्यक्ति एसियामै रहेको पनि प्रतिवेदनमा उल्लेख छ ।
अमेरिका र चीनको मात्रै सङ्ख्यात्मक हिसाबले भने अमेरिका चीनभन्दा निकै अगाडी छ । अमेरिकामा कुल ८० हजार व्यक्तिसँग तीन अर्ब रुपैयाँभन्दा बढी सम्पत्ति छ भने चीनमा यस्तो सङ्ख्या केवल १७ हजार मात्रै छ । यद्यपी पछिल्ला वर्षमा अमेरिकामा यस्तो वृद्धिदर भने निकै कम हुँदै गएको छ ।
सेयर बजारमा तीव्र उछाल र चीनको अर्थतन्त्रसँग जोडिने क्रम बढ्दै जाँदा हङकङ्मा धनीको सङ्ख्या बढ्दै गएको अनुमान गरिएको छ ।
प्रतिवेदन अनुसार हङकङ् र न्यूयोर्कपछि तेस्रो स्थानमा टोकियो रहेको छ । लस एन्जल्स, पेरिस, लन्डन। सिकागो, सान फ्रान्सिस्को, वासिङ्टन डीसी र ओसाका यो सुचीको क्रमशः चौंथोदेखि दशौं स्थानमा छन् ।
