काठमाडौं । कोरोना भाईरसको महामारीसँगै सेयर बजारमा छाएको मन्दीबाट सिर्जित समस्या सुल्झाउन नीति निर्माताहरूले यस हप्ता विभिन्न उपायहरुमाथि विचारविमर्श थालेका छन् । युरोपेली केन्द्रीय बैंकले ७५० अर्ब युरोको बन्ड खरिद गर्ने योजना अघि सारेको छ ।
संयुक्त राज्य अमेरिकामा अर्थमन्त्री स्टिभन मन्चिनले कंग्रेस समक्ष १ ट्रिलियन डलरको आपतकालीन प्रोत्साहन प्याकेज पारित गर्न आग्रह गरेका छन । विश्वको सेयर बजार निरन्तर ओरालो लागेको छ ।
अफ्रिकाका विभिन्न मुलुकमा कोरोनाभाइरसका बिरामी देखिएसँगै स्कुलहरु बन्द गरिएका छन् भने सीमा क्षेत्रमा मानिसको आवातजावतलाई थप कडा पारिएको छ ।
रसियामा पनि पहिलोपटक एक व्यक्तिको कोरोना संक्रमणबाट मृत्यु भएको छ । अष्ट्रेलिया र न्यूजील्याण्डले गैर–बासिन्दाको आगमनमा प्रतिबन्ध लगाएको छ भने दुबै मुलुकले संक्रमण नियन्त्रणमा अझ कडा कदमहरु चालेका छन् ।
यसैबीच, बिहीबार ग्रीसले ओलम्पिक ज्वाला टोकियो २०२० का आयोजकहरूलाई हस्तान्तरण गरेको छ जबकि इङलिस प्रिमियर लिग फुटबलका खेलहरु कम्तिमा आगामी अप्रिल ३० सम्म नगर्ने घोषणा गरिएको छ । (रासस/एएफपी)
