काठमाडौँ । अमेरिकाका एक संघीय न्यायाधीशले एलन मस्क नेतृत्वको सरकारी दक्षता विभागलाई ट्रेजरी विभागको रेकर्डमा राखिएका लाखौं अमेरिकीहरूको व्यक्तिगत वित्त डेटा पहुँच गर्नबाट रोक लगाएका छन् ।
अमेरिकी जिल्ला न्यायाधीश पल ए. एन्जेलमेयरले यस विषयमा प्रारम्भिक आदेश जारी गर्दै सरकारी दक्षता विभागलाई ट्रेजरी विभागका रेकर्ड पहुँचमा रोक लगाएका हुन् । मस्क र उनको टोलीलाई रेकर्डको कुनै पनि प्रतिलिपि तुरुन्तै नष्ट गर्न आदेश दिइएको थियो ।
ट्रम्प प्रशासनले मस्कको नेतृत्वमा सञ्चालित सरकारी दक्षता विभागलाई ट्रेजरी विभागसँग सम्बन्धित रेकर्डहरू पहुँच गर्न अनुमति दिएको थियो। मस्कको विभागले ‘लागत कटौती’ मा काम गरिरहेको छ ।
यस मुद्दामा, १९ राज्यका महान्यायाधिवक्ताहरूले ट्रम्प प्रशासनविरुद्ध मुद्दा दायर गरेका थिए, त्यसपछि न्यायाधीशले यो आदेश दिएका हुन् । न्यायाधीशले मस्क एक ‘विशेष सरकारी कर्मचारी’ भएको र ‘सरकारी दक्षता विभाग’ आधिकारिक सरकारी विभाग नभएको तर्क गरेका छन् । यस्तो अवस्थामा, उनको कोष विभागमा पहुँच संघीय कानूनको उल्लङ्घन हो । अदालतको आदेशपछि मस्कले यो निर्णय बिल्कुल बुद्धिमानीपूर्ण नभएको टिप्पणी गरेका छन् ।
