काठमाडौं । युरोपेली देश फ्रान्सले हरितगृह ग्यास उत्सर्जनमा कटौती गर्ने महत्वपूर्ण निर्णय गरेको छ । फ्रान्सले कार्बन उत्सर्जन घटाउनका लागि छोटो दुरीको आन्तरिक उडानमा प्रतिबन्ध लगाएको छ । फ्रान्सको म्याक्रोन सरकारले रेलमा साढे दुई घण्टाभन्दा कम समय लाग्ने दूरीमा हवाइ उडान रोक्ने निर्णय गरेको छ । तर, यो प्रतिबन्धले कनेक्टिङ उडानलाई भने असर गर्ने छैन ।

फ्रान्सेली यातायात मन्त्री क्लेमेन्ट ब्युनले कार्बन उत्सर्जन घटाउन यो आवश्यक र महत्त्वपूर्ण कदम भएको बताए–‘हामी हाम्रो जीवनको कार्बन फुटप्रिन्ट कम गर्न चाहन्छौं, छोटो दूरीको हवाई यात्रा उपयुक्त होइन । यो प्रतिबन्धमार्फत निजी जेट उडानहरू प्रतिबन्ध लगाउने हाम्रो उद्देश्य हो ।’ नयाँ नियमअनुसार रेल सेवालाई पनि सहज बनाइने भएको छ । रेल सेवा सबै छोटो रुटमा हुनुपर्ने र यात्रु समयमै उपलब्ध हुनुपर्नेमा ध्यानाकर्षण गराइएको छ ।

नयाँकानूनले छोटो यात्रा गर्ने यात्रुले सोही रुटमा आठ घण्टापछि फेरि रेल चढ्न पाउने गरी फर्कन सक्ने व्यवस्था पनि गरेको छ । दुई वर्षअघि फ्रान्सेली सांसदहरूले यससँग सम्बन्धित प्रस्तावमा मतदान गरेका थिए । रेलबाट दुईदेखि साढे दुई घण्टामा यात्रा पूरा गर्न सकिने ठाउँमा हवाई सेवा बन्द गर्नुपर्ने व्यवस्था यस प्रस्तावमा थियो ।

रिपोर्टले के भन्छ

युरोपेली फेडेरेसन फर क्लिन ट्रान्सपोर्टको प्रतिवेदनअनुसार निजी जेटले व्यावसायिक उडानको तुलनामा १४ गुणा बढी प्रदूषण गर्छ । व्यापारिक उडानहरूले रेलको तुलनामा ७७ गुणा बढी कार्बन उत्सर्जन गर्छन । निजी जेटहरू ट्रेनहरू भन्दा ६० गुणा बढी खतरनाक छन् । कोरोनाका कारण सन् २०१९ को तुलनामा उडान ४२ प्रतिशतले घटेको एयरलाइन्सले जनाएको छ ।

एयरलाइन्स उद्योग आक्रोशित

फ्रान्स सरकारको छोटो दुरीको उडानमा प्रतिबन्ध लगाउने निर्णयप्रति एयरलाइन्स उद्योग आक्रोशित बनेको छ । एयरलाइन्स समूह ‘एयरलाइन्स फर युरोप’का प्रमुखले कार्बन प्रदूषण रोक्नको लागि यो निर्णय बढी प्रतीकात्मक भएको बताए । ‘यसले जलवायुमा खासै प्रभाव पार्दैन । सरकारले प्रतिबन्धको सट्टा ठोस र वास्तविक समाधान खोज्नुपर्छ’, उनले भने ।

सन् २०१९ मा राष्ट्रपति म्याक्रोनले सन् २०१९ मा ‘फ्रान्सेली नागरिक सम्मेलन अन क्लाइमेट’ गठन गरेका थिए । सम्बन्धित १५० सदस्यले चार घण्टाभित्र रेलबाट पुग्न सकिने ठाउँमा उडान रोक्न सुझाव दिएका थिए । तर, केही क्षेत्र र वायुसेवा कम्पनीको आपत्तिपछि त्यसलाई साढे दुई घण्टामा झारिएको थियो । अनुवाद गरिएको