कोभिड–१९ को त्रासबीच पनि भौतिक पूर्वाधार निर्माणको क्षेत्रमा सक्रिय निर्माण व्यवसायीहरुलाई हतोत्साहित गर्ने गरी अज्ञात समुहबाट भइरहेका हिंसात्मक घटनाहरू प्रति आफ्नो गम्भीर ध्यानाकर्षण भएको नेपाल निर्माण व्यवसायी महासंघले जनाएको छ ।
रुपन्देही जिल्लाको सियारी गाउँपालिकामा सियारी पहुँच मार्ग अन्र्तगतको सडक खण्ड निर्माणमा प्रयोग भइरहेको ट्रक र डिष्ट्रिव्युटर (मेसिन) मा अज्ञात समुहबाट बुधवार विहान आगजनी गरिएको महासंघद्वारा जारी विज्ञप्तिमा उल्लेख छ । गाँउपालिकाको भवन अगाडि पार्किङ गरी राखिएको एक ट्रक र एक डिष्ट्रिव्युटरमा आगजनी गर्दा कम्तीमा पनि ५० लाख भन्दा बढीको क्षति भएको महासंघका महासचिव रोशन दाहालद्वारा जारी विज्ञप्तिमा जनाइएको छ ।
निर्माण व्यवसायी संघ नवलपरासीका अध्यक्ष समेत रहेका लुम्बिनी प्रदेश निर्माण व्यवसायी महासंघका उपाध्यक्ष नविन ज्ञवालीको नविन कन्स्ट्रक्सनको लु.१.क. ६९७६ नम्बरको ट्रक र डिष्ट्रिव्युटरमा आगजनी गरिएको हो । ती सवारी साधन पुष्पाञ्जली–समिर–जिम्बा जेभीद्वारा सडक निर्माणमा प्रयोग भइरहेका थिए ।
आगजनीका कारण दुवै उपकरणहरु पूर्ण रुपमा काम नलाग्ने गरी ध्वस्त भएका छन् । निर्माण व्यवसायी र उनीहरुका उपकरणहरुको सुरक्षालाई लिएर महासंघले पटक पटक प्रधानमन्त्री सहित सरोकारवाला सबैको ध्यानाकर्षण गराइरहँदा समेत हिंसात्मक गतिविधिमा कुनै कमी नआउनु ठूलो चिन्ताको विषय भएको महासंघले जनाएको छ ।
यस्तै सिलसिला जारी रहेमा देशभरका निर्माण कार्य ठप्प पारी सशक्त आन्दोलनमा जान बाध्य हुने चेतावनी महासंघले दिएको छ । तत्काल दोषीलाई पक्राउ गरी कडा भन्दा कडा सजाय दिन र सम्बन्धित् निर्माण कम्पनीहरुलाई क्षतिपूर्ति दिन महासंघका महासचिव दाहालले जोडदार माग गरेका छन् । साथै देशभरका निर्माण व्यवसायी र उनीहरुका उपकरणको सुरक्षाको भरपर्दौ व्यवस्था मिलाउन पुनः एक पटक सरोकारवाला सबैको ध्यानाकर्षण गराएको छ
