नारायण अधिकारी
चितवन । नारायणगढ–मुग्लिन सडकखण्डमा तोकिएको समयमा काम पूरा नगर्ने ठेकेदार कम्पनीबाट रु ७५ लाख जरिवाना असुल गरिएको छ ।
सडक निर्माणमा ढिलासुस्ती गरेका कारण सो सडकको पहिलो र तेस्रो खण्डको जिम्मेवारी पाएका दुई निर्माण कम्पनीबाट जरिवाना असुल गरिएको हो ।
नारायणगढ–मुग्लिन सडक आयोजनाका इञ्जिनियर शिव खनालका अनुसार पहिलो खण्ड आँपटारीदेखि झण्डै १३ किमी सडकखण्ड निर्माणको जिम्मा लिएको बिएलए श्रेष्ठ जेभी निर्माण कम्पनी र तेस्रो खण्ड सिमलतालदेखि मुग्लिनसम्मको जिम्मा लिएको सुप्रिम रौताहा जेभी निर्माण कम्पनीबाट जरिवाना असुल गरिएको हो । पहिलो खण्डको बिएलए तथा श्रेष्ठ निर्माण कम्पनीबाट रु आठ लाख र तेस्रो खण्डको सुप्रिम तथा रौताहा निर्माण कम्पनीबाट रु ६७ लाख जरिवाना असुल गरिएको छ ।
खनालका अनुसार मंसिर महिनामा उनीहरुले पाउने भुक्तानीबाट जरिवाना असुल गरिएको छ । सो सडकखण्ड दुई वर्षभित्र सम्पन्न गर्न ठेकेदार कम्पनीलाई रु दुई अर्ब ९० करोडमा ठेक्का दिइएको थियो ।
पहिलो खण्डको रु ६१ करोड, दोस्रो खण्डको रु ९८ करोड र तेस्रो खण्डको रु एक अर्ब ३१ करोडमा ठेक्का दिइएको थियो । खनालका अनुसार ठेक्का दिँदा समयलाई तीन भागमा विभाजन गरेर पहिलो आठ महिनामा १५ प्रतिशत, दोस्रो आठ महिनामा ५० प्रतिशत र तेस्रो आठ महिनामा बाँकी काम सम्पन्न गर्नुपर्ने शर्त राखिएको थियो । दोस्रो आठ महिनाको समयमा ५० प्रतिशत काम सम्पन्न नगरेपछि पहिलो खण्ड र तेस्रो खण्डका निर्माणमा कम्पनी जरिवानामा परेका हुन् ।
भूकम्प, नाकाबन्दी, चक्काजामलगायतका कारण थप भएको समयसीमामा पनि काम सम्पन्न नगरेपछि उनीहरुलाई जरिवाना गरिएको हो ।
पहिलो आठ महिनामा निर्धारित काम नभएमा शून्य दशमलव ००७५ प्रतिशत, दोस्रो आठ महिनामा काम सम्पन्न नभएमा शून्य दशमलव ०२५ प्रतिशत र तेस्रो आठ महिनामा काम सम्पन्न नभएमा शून्य दशमलव ०५ प्रतिशत जरिवाना गरिने सम्झौता गरिएको थियो ।
कूल ३२ दशमलव २ किमी लम्बाइ रहेको सो सडकको हालसम्म १३ दशमलव ५ किमी सडकको एक तहको कालोपत्र भएको छ । तीन तह कालोपत्र गर्नुपर्ने हुन्छ । बाँकी भागको कालोपत्र र ८०० मिटर भित्तो काट्ने काम बाँकी नै रहेको छ ।
सन् २०१५ को अप्रिलमा दुई वर्षभित्रमा काम सम्पन्न गर्ने गरी तीन वटा निर्माण कम्पनीलाई सो सडकको ठेक्का दिइएको थियो । राजधानी प्रवेश र बाहिरिने मुख्य मार्ग भएकाले सरकारको उच्च प्राथमिकतामा रहेको यो सडकमा विभिन्न बहानामा निर्माण कम्पनीले निर्माणमा ढिलाइ गरिरहेका छन् ।
तेस्रो पटक मिति थप गरेपछि पहिलो खण्ड आँपटारीदेखि झण्डै १३ किमी सडकखण्ड निर्माणको जिम्मा लिएको बिएलए तथा श्रेष्ठ निर्माण कम्पनी र तेस्रो खण्ड सिमलतालदेखि मुग्लिनसम्मको निर्माणको जिम्मा लिएको सुप्रिम तथा रौताहा निर्माण कम्पनीको ठेक्का अवधि अब २०१८ फेब्रुअरीसम्म पुगेको छ । पहिलो खण्डको मिति फेब्रुअरी १४ र तेस्रो खण्डको फेब्रुअरी २० सम्म मिति थप गरिएको छ ।
गएको चैत महिनायता पहिरो, वर्षा, दुई पटकको निर्वाचनलगायतका कारण काम रोकिएको र त्यो समयको म्याद थप गर्न बाँकी रहेको आयोजनाले जनाएको छ । खनालका अनुसार बढीमा ४५ दिनसम्म म्याद थप हुन सक्ने देखिएको छ । आउँदो चैत मसान्तसम्ममा सडक सम्पन्न हुनुपर्ने उनले बताए ।
हालसम्म सडकको ६६ प्रतिशत मात्रै काम सम्पन्न भएको छ । पहिलो खण्डमा ६७ दशमलव १ प्रतिशत, दोस्रो खण्डमा ६९ दशमलव ५ प्रतिशत र तेस्रो खण्डमा ५८ प्रतिशत मात्रै काम सम्पन्न भएको छ ।
एशियन हाइवेअन्तर्गतको एएच ४ टु खण्डअन्तर्गत नारायणगढ–मुग्लिन सडकखण्ड पर्छ । चीन हुँदै नेपालको कोदारी–काठमाडौँ, नागढुंगा–नौबिसे, मुग्लिन–नारायणगढ, हेटौँडा–वीरगञ्ज हुँदै भारतको मुजफ्फरपुर हुँदै जाने यो सडक एशियन हाइवेको एक खण्ड हो ।
राजधानी काठमाडौँबाट तराईका जिल्ला बाहिरिने र भित्रिने मुख्य मार्ग भएकाले यो सडक व्यस्त रहने गर्छ । सडकको १६ किलोदेखि मुग्लिनसम्म नौ मिटर फराकिलो र १६ किलोदेखि आँपटारीसम्म ११ मिटर फराकिलो सडक निर्माण गरिँदैछ ।
रासस
