काठमाडौं । काठमाडौं उपत्यकामा जारी निषेधाज्ञाको अवधि बुधबार रातिदेखि सकिदैं छ । यससँगै जारी निषेधाज्ञा अब के हुने हो भन्ने आम चासोको विषय बनेको छ । निषेधाज्ञा थप्ने वा थप्ने विषयमा सरकारले छलफल शुरु गरेको छ ।
निषेधाज्ञाका सम्बन्धमा उपत्यकाका तीनवटै जिल्ला प्रशासन कार्यालयका प्रमुख, उद्योग वाणिज्य महासङ्घ र महानगरीय ट्राफिक प्रहरी महाशाखाका पदाधिकारीबीच छलफल भइरहेको बताइएको छ । बैठकमा आर्थिक गतिविधि ठप्प भएकाले मोडालिटी परिवर्तन गरेर निषेधाज्ञालाई केही खुकुलो बनाउने बारेमा पनि परामर्श भइरहेको बताइएको छ ।
यो छलफलपछि सुरक्षाकर्मीसित छलफल गर्ने र त्यसपछि फेरि प्रमुख जिल्ला अधिकारीबीच छलफल हुने बताइएको छ ।
कोरोना भाइरस संक्रमितको सङ्ख्या बढेपछि सरकारले काठमाडौं उपत्यकामा गत भदौ तीन गते देखि निषेधाज्ञा जारी गरेको थियो । हालसम्म १–१ हप्ता गरि दुई हप्ता लगातार निषेधाज्ञा जारी भइसकेको छ ।
करीब ६ महिनायता निरन्तरको लकडाउन र निषेधाज्ञाले सर्वसाधारण र व्यवसायी भने निकै समस्यामा परेका छन् । जसका कारण उनीहरुले भने लकडाउन वा निषेधाज्ञाका नाममा थप प्रतिबन्धहरु नलगाउन सरकारसँग माग गर्दै आएका छन् ।
सरकार भने मोडालिटी परिवर्तन गरेर भएपनि अझै एक हप्ता भदौं महिनाभर काठमाडौं उपत्याकामा निषेधाज्ञा जारी गर्ने योजनामा रहेको गृह मन्त्रालय स्रोतले बताएको छ ।
दाहालले उपत्यकाका निम्न आय भएका वर्गको अवस्था जटिल बन्दै गएको बताउँदै अब निषेधाज्ञा गर्न नहुने बताएको स्रोतले बतायो । काठमाडौंमा निषेधाज्ञाबारे तीनै जिल्लका सिडिओहरुले विभिन्न क्षेत्र तथा स्वास्थ्य विज्ञसँग पनि परामर्श गरेर स्वास्थ्यसँगै आर्थिक र सामाजिक प्रभावलाई ध्यानमा राखेर निर्णय गर्ने बताएइएको छ ।
स्रोतका अनुसार काठमाडौंका प्रमुख जिल्ला अधिकारी दाहाल निषेधाज्ञा हटाउने पक्षमा रहेपनि ललितपुरका नारायणप्रसाद भट्ट र भक्तपुरकी सिडिओ हुमकला पाण्डे भने कोरोनाको जोखिम थप बढने भन्दै निषेधाज्ञा जारी राख्नुपर्ने पक्षमा छन् ।
