काठमाडौं । लामो समयदेखि लगानीकर्ताहरुले पूर्व अर्थमन्त्री डा. युवराज खतिवडाको नाममा सेयर बजारमा गर्दै आएको चलखेल उदांगो भएको छ । केही सिमित स्वार्थ समुहका लगानीकर्ताहरुले अर्थमन्त्रीबाट युवराज खतिवडा हट्ने सन्देश दिएर केही समय बजार बढाएपनि खतिवडा हटेसँगै पुनः घट्न सुरु गरेको छ । अर्थमन्त्रीबाट खतिवडा हटेको पहिलो दिन दोहाोरो अंकले घटेको नेप्सेमा भोलिपल्ट पनि सोही अंकको गिरावट आयो ।
विभिन्न सामाजिक संजालहरुमा लगानीकर्ताहरुले अर्थमन्त्रीलाई देखाएर पटकपटक बजार घटाउने र बढाउने गरेपनि अब भने त्यो खेल बन्द भएको देखिएको छ । शुक्रबार डा. खतिवडाको बहिर्गमनसँगै उत्साहित भएका सिमित स्वार्थका लगानीकर्ताले २ कारोबार दिनमा नै निराश हुनुपर्याे ।
नेपाल स्टक एक्सचेन्ज (नेप्से)का अनुसार सोमबार पनि आईतबारजस्तै बजार दोहोरो अंकले ओरालो लागेको छ । बिहानैदेखि घटबढ भईरहेको बजारमा सोमबार १२ दशमलव १७ अंकको गिरावट आएको छ ।
सोमबार ट्रेडिङ समुहको परिसूचकमा २२ अंकको सुधार आउँदा अन्य केही पसरसूचकमा भने गिरावट आएको छ । नेप्सेका अनुसार आज बीमा समुहको परिसूचकमा सबैभन्दा बढी गिरावट आएको छ । जिवन बीमा समुहको परिसुचकमा सोमबार ९२ अंकको गिरावट आउँदा निर्जिवन बीमा समुहको परिसुचकमा भने ४६ अंकको गिरावट आएको छ ।
यस्तै आज बजारमा सबैभन्दा बढी प्रभुत्व रहेको बैंकिङ समुहको परिसूचक पनि १७ अंकले ओरालो लाग्न पुगेको छ । यस्तै आज अन्य समुहको परिसुचक भने ३ अंकले उकालो लाग्दा माईक्रोफाईनान्स समुहको परिसुचकमा १ अंकको वृद्धि भएको छ ।
बिहानैदेखि घटबढ भएको बजारमा कारोबार रकमले समेत साथ छोडेको छ । नेप्सेका अनुसार आज दिनभरीमा १ सय ९२ कम्पनीका ५५ लाख ९५ हजार ५ सय ५१ कित्ता सेयर किनबेच हुँदा २ अर्ब १६ करोड ४९ लाख ३० हजार २ सय १४ रुपैयाँको कारोबार भएको छ ।
