काठमाडौं । गत आर्थिक बर्ष २०७६/७७ मा नेपालले गर्ने वैदेशिक व्यापारमा सुधार आएको छ । नेपाल राष्ट्र बैंकले सोमबार साँझ सार्वजनिक गरेको तथ्यांकअनुसार गत बर्ष नेपालले गर्ने आयातको व्यापारमा १५ दशमलव ६ प्रतिशतको गिरावट आउँदा निर्यातको व्यापारमा भने सामान्य सुधार आएको छ ।
राष्ट्र बैंकको तथ्यांकअनुसार अघिल्लो आर्थिक बर्षको तुलनामा गत बर्ष नेपालले आयात घटाउँदै ११ खर्ब ९६ अर्ब ८० करोड रुपैयाँ बराबरको मालवस्तु आयात गरेको छ । जुन अघिल्लो आर्थिक बर्षको तुलनामा १५ दशमलव ५ प्रतिशतले कम हो । यस्तै निर्यातको वृद्धिदरमा भने गत बर्ष अघिल्लो बर्षको तुलनामा केही कमी आएपनि वृद्धि भने पोजेटिभ छ । अघिल्लो आर्थिक बर्ष नेपालले गर्ने निर्यातको वृद्धि १९ दशमलव ४ प्रतिशतले भएपनि गत बर्ष प्रतिकुल समयका कारण नेपालले गर्ने निर्यातको व्यापारमा जम्मा शुन्य दशमलव ६ प्रतिशतको वृद्धि भएको छ ।
नेपाल राष्ट्र बैंकका अनुसार गत आर्थिक बर्षभरी नेपालले ९७ अर्ब ७१ करोड रुपैयाँ बराबरको निर्यातको व्यापार गरेको छ । गत बर्ष तयारी पोशाक, जस्तापाता, तार, पोलिस्टरलगायतका बस्तुको निर्यातमा कमी आउँदा पाम तेल, आयुर्वेदिक औषधि, जडिबुटी, प्लास्टिकका भाँडालगायतको निर्यात बढेको छ ।
साथै आयातको सबैभन्दा माथि भने कच्चा पाम तेल, कच्चा सोयाविन तेल, रसायनिक मल, खाने तेललगायतको आयात बढ्दा पेट्रोलियम पदार्थ, यातायातका साधन, पार्टपुर्जा, एमएस बिलेटलगायतको आयातमा गिरावट आएको छ ।
गत बर्ष भारतमा हुने निर्यातमा ११ प्रतिशतको वृद्धि भएको राष्ट्र बैंकको तथ्यांकमा उल्लेख छ । तथ्यांक अनुसार चीन तथा अन्य मुलुकतर्फ क्रमशः ४३ र १८ प्रतिशतले निर्यात व्यापार ओरालो लागेको छ । यस्तै आयात हुने बस्तुहरुमा भने भारत, चीन तथा अन्य मुलुकबाट हुने आयातमा नै ठुलो ह्रास आएको छ ।
नेपाल राष्ट्र बैंकका अनुसार यसरी आयातमा गिरावट र निर्यातमा केही वृद्धि हुँदा नेपालको व्यापारघाटा समेत १६ दशमलव ८ प्रतिशतले गिरावट आएको छ । अघिल्लो बर्ष १३ प्रतिशतले बढेको व्यापारघाटा गत बर्ष घट्दै १० खर्ब ९९ अर्ब ९ करोडमा पुगेको छ ।