काठमाडौं। विश्वव्यापी कोरोना (कोभिड–१९) भाइरसका कारण ३६ लाख ४१ हजार २०४ संक्रमितमध्ये ११ लाख ९२ हजार ९५९ जना उपचारपछि निको भएका छन् । यस्तै कोरोनाका कारण हालसम्म विश्वभर दुई लाख ५१ हजार ९४७ जनाको ज्यान गएको छ । पछिल्लो तथ्याङ्क अनुसार कोरोनाका कारण अमेरिकामा ६९ हजार ७०९ जनाको ज्यान गएको छ । संक्रमितको संख्या १२ लाख ११ हजार ८३८ पुगेको छ ।
इटालीमा दुई लाख ११ हजार ९३८ संक्रमितमध्ये २९ हजार ७९ जनाको मृत्यु भएको छ । स्पेनमा दुई लाख ४८ हजार बढी कोेरोना संक्रमितमध्ये २५ हजार ४२८ जनाको मृत्यु भएको छ ।
बेलायतमा संक्रमितको संख्या एक लाख ९० हजार पाँच नाघ्दा २८ हजार सात सय बढीको ज्यान गएको छ । फ्रान्समा संक्रमितको संख्या एक लाख ६९ हजार चार सय नाघेको छ । जसमध्ये २५ हजार दुई सय जनाको मृत्यु भइसकेको छ ।
यस्तै जर्मनीमा एक लाख ६६ हजार १५२ संक्रमितमध्ये ६ हजार ९९३ जनाको मृत्यु भएको छ । टर्कीमा संक्रमितको संख्या एक लाख २७ हजार ६५९ पुगेको छ ।
भारतमा पनि कोरोना संक्रमणको दर उच्च छ । ४६ हजार ४३७ जनामा संक्रमण देखिएको छ भने एक हजार ५६६ जनाको मत्यु भएको छ । त्यस्तै नेपालमा ७५ जनामा कोरोना सङ्क्रमण भएकोमा १६ जना निको भएका छन् ।
