काठमाडौं । डोटीका अधिकांश ग्रामीण भेकमा रहेका नागरिकले विद्युतको न्यूनतम महशुल मूल्य १ सय रुपैयाँ बुझाउन १५ सय रुपैयाँ खर्च गर्नु परिरहेको छ । जिल्ला सदरमुकाम सिलगढी तथा पुरानो क्षेत्रीय सदरमुकाम दिपायलबाट टाढा बसोबास गर्नेले वर्षौंदेखि यस्तो नियति झैल्दै आएका छन् ।
जिल्लाका बाझकाकाँनी, कालिकास्थान, खातिवडा, दहकालिका स्थान, रानागाउँ, मौवा, सलेना, फलेडी, कुलाउ, जमलकटिया, वाइल, वासुदेवी, झिगाबस्ती, मुडभारा, मरकट्टे, कपल्लेकीलगायतका गाउँबाट नेपाल विद्युत् प्राधिकरण मुख्य शाखा कार्यालय दिपायल पिपल्लामा आउनुपर्छ । महशुल तिर्न आउँदा करिब १५ सय रुपैयाँ खर्च हुने गरेको बाझकाकाँनीका नरेश खड्काले बताए ।
उनले भने, ‘हामी त अलि नजिक छौँ, दहकालिका, तोलेनीलगायतका गाउँका जनताले त ३ सय रुपैयाँसम्म गाडी भाडा तिरेर महशुल बुझाउन आउनुपर्छ । त्यति मात्र होइन कहिलेकाहीँ विद्युत् कार्यालयको कम्प्युटर बिग्रियो वा पालो पुगेन भने दुई दिनसम्म दिपायलमै बास बस्नुपर्छ, हामीलाई निकै समस्या भएको छ ।’
त्यस्तै सायल गाउँपालिकाका स्थानीय ललितबहादुरका अनुसार गाउँमा टिभी पनि छैन, फ्रिज हुँदैन, पानी तान्ने मोटर छैन खाली बत्ती मात्र बाल्ने गर्छौं, महशुल कम रकम आउँछ, कसैको त १ रुपैयाँ पनि पुग्दैन । सय रुपैयाँ नपुगे पनि त्यही रकम तिर्न १५ सय रुपैयाँ भन्दा बढी खर्च गरेर आउनु पर्छ । उनले भने, ‘पहिला पहिला त नुन, तेल, साबुन, चिनी, लुगाकपडा ल्याउने निहुँले दिपायल आउँथ्यौँ, अहिले सबैकुरा गाउँमा नै पाइन्छ, १ सय रुपैयाँ तिर्न १५ सय बढी खर्च गर्नुपर्ने हुन्छ ।’
सायल गाउँपालिकाका तेज डुम्रेलले भने, ‘गरिब जनताले कहाँबाट त्यति रकम तिर्न सक्छ, विद्युत् महशुल गाउँमा लिने व्यवस्था हुनु पर्छ ।’ गाउँमा बैंकिङ सेवामार्फत महशुल बुझाउने गरि ध्यानदिन केआइसिंह गाउँपालिका ५ का स्थानीय शेरेन्द्रविक्रम शाहीले आग्रह गरे ।
उनले भने, ‘गाउँपालिकामा विभिन्न बैंकका शाखा खुलेका छन, अब विद्युत् महशुल पनि त्यहीबाट बुझाउने व्यवस्था मिलाए जनतालाई सहज हुने थियो ।’ नेपाल विद्युत् प्राधिकरण दिपायलका प्रमुख कपिलदेव जोशीले डोटीका ग्रामीण भेकमा तत्कालै विद्युत् महशुल बुझाउने काउन्टर खोल्न समस्या हुने बताएका छन । उनले भने, ‘गाउँघर टाढा पनि छन् र हामीसँग कर्मचारीको पनि अभाव रहेकाले तत्काल विद्युत् महशुल बुझाउने काउण्टर खोल्न समस्या भएको हो ।’ पिपल्लामा रहेको विद्युत् काउण्टरमा दैनिक सेवा ग्राहीको भीड लाग्ने गरेको छ/रासस
