बिजखबर संवाददाता
२८ जेठ, काठमाडौं । नागरिक लगानीकोषले सहायक कम्पनी स्थापना गरी सेयर बजारमा लगानी गर्ने भएको छ । केही समय अघि बजारलाई विश्वासिलो र दिगो बनाउने उद्देश्यले संस्थागत लगानीकर्ताहरुले सक्रिय सहभागिता जनाउनुपर्ने विषयमा अर्थमन्त्रालयमा सचिवस्तरीय छलफल भएको थियो । सोही अनुरुप कोषको बूधबार बसेको सञ्चालक समितिको वैठकले सहायक कम्पनी स्थापना गरी सेयर बजारमा लगानी गर्ने निर्णय गरेको हो ।
कोषसम्वद्ध सूत्रका अनुसार सहायक कम्पनीको प्रवन्धपत्र र नियमावली तयार गर्ने काम केही समयअघि देखि नै भैरहेको थियो । कोषले बजारमा आफ्नो दरिलो उपस्थिति देखाउने र विशिष्टकृत सेवा दिने उद्देश्यले सहायक कम्पनी स्थापनाको तयारी गरिरहेको थियो ।
कोषसँग प्रशस्त तरलता भएको र आफ्नो उद्देश्यमध्येमा पुँजी बजार पर्ने भएकाले लगानीको लागि तयारी गरिरहेको हो । लगानी वा विक्रीको निर्णय तत्काल गर्नुपर्ने भएकोले सहायक कम्पनीको व्यवस्थापनलाई प्रशस्त अधिकार र स्वायत्तता दिएर काममा लगाइने उक्त स्रोतको भनाई छ ।
कोषसँग अहिले झण्डै ६० अर्ब जत्तिको रकम जम्मा रहेको छ । त्यसमध्ये ३० प्रतिशत लगानी गर्न सकिने सीमा रहेको छ । तरलताको समुचित व्यवस्थापन हुनसक्ने गरी पुँजी बजारमा लगानी हुनेछ । प्राथमिक बजारमा त अहिले पनि लगानी भैरहेको छ अव दोस्रो बजारमार्फत पनि लगानी हुनेछ । असारको मध्यसम्ममा कम्पनी स्थापना भैसक्ने कोषले जनाइएको छ ।
संस्थागत लगानीकर्ताहरु बजारमा छिरेपछि कुनैपनि कम्पनीको सेयर अनावश्यकरुपमा बढेमा आफूसँग भएको सेयर बिक्री गरिदिने र बजारमूल्य घटेमा बजारबाट सेयर खरिद गर्ने काम कोषले गर्नेछ । जसले गर्दा सेयरको मूल्यमा स्थिरता आउने हुन्छ ।
यसैबीच कोषले आफूसँग जम्मा भएको रकमलाई लगानीमा विविधिकरण गर्न विदेशमा पनि लगानी गर्न राष्ट्र बैंकसँग कुराकानी भैरहेको जनाइएको छ ।
