काठमाडौं । आईतबार देखि बन्द भएको गौतम बुद्ध अन्तरराष्ट्रिय विमानस्थल निर्माणको काम अन्यौलमा परेको छ ।
नेपाल नागरिक उड्डयन प्राधिकरण अन्तरगतको राष्ट्रिय गौरब आयोजनाका प्रमुख प्रदिप अधिकारीले सोमबार देखिनै काम सुरु हुने बताएपनि चिनियाँ ठेकेदार नर्थवेस्टले डिजेल अभाब देखाउँदै काम रोकेको छ ।
नेपालका अन्य ठूला आयोजनामा देखिने रोगले गौतम बुद्ध विमानस्थललाई समेत अछुत राख्न सकेनन् । ठेकेदार कम्पनीले कहिले गिटी बालुवा त कहिले तेल अभाव भन्दै काम रोक्दै आएको छ ।
करिब १०÷१५ दिन देखि विभिन्न समस्या देखाउँदै आएको नर्थवेस्टले यही आईतबारदेखि सम्पूर्ण काम रोके पछि शनिबार राती नै अर्थ मन्त्रालयले संस्कृति पर्यटन तथा नागरिक उड्डयन मन्त्रालयलाई ७० करोड रुपैयाँ निकासा गरेको थियो ।
अर्थले स्वीकृत गरेको उक्त रकम बराबरको बील भर्पाइ एशियाली विकास कैंक (एडिबी) लाई पठाउनका लागि बाटो मात्रै खुलेकाले काम रोकिएको विमानस्थल आयोजना प्रमुख प्रवेश अधिकारीले बताए ।
उनका अनुसार सो रकम आउन ढिला भएमा प्राधिकरणमार्फत खर्च गर्न पाउने ३७ दशमलब ४ प्रतिशत रकमबाटै खर्च गरि काम अगाडी बढाउने तयारी समेत भईरहेको छ ।
तर पछिल्लो चरणका गतिविधिले गर्दा पर्यटन मन्त्री रविन्द्र अधिकारीको निधनसँगै उक्त विमानस्थलको काम पनि सुस्ताउने हो की भन्ने सम्बद्ध अधिकारीहरु बताउँछन ।
सो विमानस्थलको भौतिक निर्माण कार्य करिब ७२ प्रतिशत सम्पन्न भईसकेको छ भने ईलेक्ट्रिक लगायत सबै गर्दा भने ८० प्रतिशतको हाराहारीमा निर्माण कार्य सम्पन्न भईसकेको छ ।
उक्त विमानस्थलको धावन मार्गको तेस्रो तहको कालोपत्रेको काम सम्पन्न भएर चौथो तहको मात्रै ५ सय मिटर बाँकी रहेको छ । उक्त काम सम्पन्न गरे पछि मात्रै ट्याक्सी वेको काम गर्ने प्रमुख अधिकारीले बताएका छन ।
तर विमानस्थलको निर्माण कार्य तीब्र गतिमा अगाडी बढिरहेको बेला ठेकेदार कम्पनीले बिभिन्न बहानामा काम रोके पछि नेपालीको काम गर्ने तरिका नै परिवर्तन गर्नु पर्ने अधिकारीको भनाई रहेको छ ।
उनले भने, ‘हामी कागजी प्रकृयामा मात्रै समय खर्चिन्छौं निर्माणको बेला के कस्तो समस्या आउँछन त्यसमा ध्यान दिँदैनौं । माथिल्लो निकाय यस्मा गम्भिर भएर लाग्नु पर्ने हो तर त्यस्तो नदेखिँदा समस्या आईरहन्छ ।’
