बिजखबर संवाददाता
काठमाडौं । १८ औं फ्लोरा एक्स्पो शनिवारदेखि सुरु भएको छ । काठमाडौंको भृकुटीमण्डपमा सुरु भएको एक्स्पोको कृषि तथा सहकारी मन्त्री हरी पराजुलीले उद्दघाटन गरे । सो अवसरमा मन्त्री पराजुलीले कृषिलाई व्यवसायिकरण गर्न आवश्यक रहेको बताए ।
साथै यसको प्रवद्र्धनका लागि नेपाल सरकार तत्पर रहेको बताए । ‘सरकार सहयोग गर्न इच्छुक छ’, उनले भने ‘तर यसका लागि कृषकहरुले आफ्ना समस्या तथा विचार हामीलाई सुनाउनु आवश्यक छ ।’
नेपाल दिनदिनै पुष्प व्यवसायमा आत्मनिर्भर हुँदै गएकोमा खुसी लागेको बताए । तर पुष्प व्यवसायमा आएका समस्याका बारेमा व्यवसायीहरुले केही नभनेकोमा गुनासो गरे । क्षेत्रमा के समस्या छन् भनेर जान्ने हामीसँग दिव्यज्ञान छैन उनले भने त्यसैले व्यवसायी तथा कृषकहरु समस्या समाधानका लागि आफै मन्त्रालय आउनुपर्छ ।
सो अवसरमा मन्त्रालयका सचिव उत्तमकुमार भट्टराईले पुष्प व्यवसायमा अध्ययनको आवशयकता रहेको बताए । साथै मन्त्रालय पुष्प व्यवसायको बजारीकरणको समेत सहयोग गर्न तयार रहेको जानकारी दिए ।
आयोजक फ्लोरिकल्चर एशोसिएसनका अध्यक्ष लोकनाथ गैरेले एशोसिएसन नेपाललाई पुष्प व्यवसायमा आत्मनिर्भर बनाउन उत्पादन क्षमता बृद्धि गर्ने काममा जुटिरहेको बताए । साथै पुष्प आयात विस्तारै कम हुँदै गएको दावी गरे ।
तर आयातलाई पूर्ण रुपमा प्रतिष्थापन गर्न भने नसकिएको उनले जानकारी दिए ।
हामी विस्तारै फूलमा आत्मनिर्भर भएर विदेश समेत निर्यात गर्ने सोचमा छौ उनले भने । यसका लागि विदेशका आयतकर्ता र नेपालका निर्यातकर्ताबीच छलफल गर्ने उनले जानकारी दिए ।
एक्स्पोमा व्यवसायिक स्टल ६५ वटा, सूचनामुलक १० वटा र फूल बिरुवाको प्रतिस्पर्धात्मक प्रदर्शनी स्टल ३ वटा सहित गरी जम्मा ७८ वटा प्रदर्शनी कक्ष रहेका छन् । मौसमी फूल, आलंकारीक बोट बिरुवा, कट फ्लावर, ड्राइफ्लावर, सुनखरी, विभिन्न विउ विजनलगायत प्रदर्शन गरिएको छ ।
