काठमाडौं । नेपाललाई आर्थिक समृद्धिका लागी जापानी प्रविधि तथा लगानीको आवश्यकता रहेको सम्वन्धित व्यवसायीहरुले बताएका छन् । बुधवार काठमाडौंमा आयोजित जापानी व्यवसायी प्रतिनिधिमण्डल तथा उद्योग मन्त्रालयका प्रतिनिधि र नेपाली व्यवसायीहरुवीचको अन्तरक्रिया कार्यक्रममा यस्तो बताइएको हो ।
सो अवसरमा जापानी प्रतिनिधिमण्डलका प्रमुख कोमोरी टाडानागाले जापानसँग भएको प्रविधिको प्रयोग गरेर नेपालका स्रोतको उपयोग गरी उद्योगको विकास गर्न सकिने बताए ।
साथै नेपाली व्यवसायीलाई नेपाल भ्रमणमा आउने पर्यटकलाई यहाँको उत्पादनको ‘मार्क’ राखि विक्री गर्न सुझाव दिए । ‘नेपालको उत्पादनको मार्क बनाएर त्यसको गुणस्तरको ज्ञारेन्टी दिन सकियो भने उद्योगको विकास का साथै अन्तरराष्ट्रिय बजारमा प्रवद्धन हुन्छ ’ उनले भने ।
प्रतिनिधिमण्डलका एक व्यवसायीले जापानमा व्यवसाय गरिरहेका नेपालीको मेहनतको प्रशंशा गरे । ‘जापानमा व्यवसाय गर्न सजिलो छैन’ उनले भने, ‘त्यहाँ मेहनत गरेर व्यवसाय गरिरहेका छन् ।’
नेपालमा भ्रमणमा आउने पर्यटकलाई नेपाली उत्पादन कसरी बेच्नेलगायतका सम्भावना बारे छलफल गरिने छ । कार्यक्रममा नेपालका लागि जापानका राजदुत मासासी ओगावले नेपालको प्राकृतिक स्रोतको उपयोग गरेर नेपालको उद्योगलाई प्रतिशपर्धी बनाउन सकिने बताए ।
सो अवसरमा उद्योग मन्त्री नविन्द्रराज जोशीले जापानी प्रतिनिधिमण्डलको भ्रमणले नेपालमा लगानीको वातावरण तयार गर्न मद्धत गर्ने बताए । साथै सवैको ध्यान आर्थिक विकासमा गएको बेलामा जापानीहरुको भ्रमणले विशेष महत्व राख्ने धारणा राखे ।
मन्त्री जोशीले नयाँ प्रविधि ‘एडप्ट’ गर्ने र त्यसमा नविनपन दिने जापानीहरुको चाहना तथा प्रवृत्तिको प्रशंसा गरे । त्यस्तै उत्पदान देखि मार्केटिङसम्म ‘पर्फेक्सन’ ले ध्यानाकर्षण गर्ने बताए । ‘पारस्पारिक लाभका लागी यहाँ लगानी गर्नुहोस’ उनले भने ‘ हामी त्यहाँ गर्न तयार छौं ।’ नेपालमा उद्योग व्यवसाय गन अन्य राष्ट्रको तुलनामा सहज भएको जानकारी दिए । साथै कम्पनी दर्ता र खारेजको प्रक्रिया समेत सहज बनाएको बताए । त्यस्तै विदेशी लगानीकर्ताले डर त्रास विना यहाँ लगानी गर्न सक्ने दावी उनले गरे । ‘लगानीकर्ता विशेष गरी आफ्नो लगानीको सुरक्षा चाहन्छन्’ उनले भने, त्यसका लागि हामी तयार छौं ।’
कार्यक्रममा नेपाली कांग्रेसका वरिष्ठ नेता रामचन्द्र पौडेलले आफुहरुको १ बर्ष अघि गएको डेलिगेसनले दुई देशवीच् राम्रो सम्वन्ध स्थापना गरेकोमा खुसी व्यक्त गरे । साथै यो ‘डेलिगेशन’ ले नेपालमा लगानीका लागि प्रोत्साहित गर्ने बताए ।
कार्यक्रममा जापानी प्रतिनिधिमण्डलका संयोजक अर्जुन अधिकारीले नेपाल र जापानका व्यवसायीहरुको सम्वन्ध र व्यवसायको सम्भाव्यताबारे छलफल गर्ने उद्देश्यसहित प्रतिनिधि मण्डल ल्याएको जानकारी दिए । साथै नेपाल जापानको लागानीका लागि माध्यम बन्ने कोशिस गरिरहेको बताए ।
प्रतिनिधिमण्डलमा २० जना व्यवसायीहरु छन् । जसमा आइसक्रिम,मिठाई, सोलार प्यानल,रियल स्टेटलगायतसँग सम्वन्धित उद्योग व्यवसायी आएका छन् । उनीहरुले पोखरा र चितवनका उद्योगहरुको अध्ययन गर्ने छन् ।
