काठमाडौं। सेयर बजारमा चलखेल भएको भन्दै संसदमा सरकारको ध्यानाकर्षण गरिएको छ । सोमबार सांसद डा. अमरेशकुमार सिंहले ब्रोकर र इन्भेष्टर्सले कार्टेलिङ गरेर सेयर मूल्य कृत्रिमरुपमा बढाइएको भन्दै सरकारलाई निगरानी गर्न आग्रह गरे । उनले सेयरको मूल्य कृतत्रम रुपमा बढाइएको आरोप लगाए ।
प्रतिनिधि सभामा विशेष समयमा बोल्दै सांसद सिंहले अहिले शेयरको मुल्य कृत्रिम रुपमा बढाइएको बताउँदै आम जनतामाथि ठगी हुनसक्ने भन्दै सरकारको ध्यानाकर्षण गराएका हुन् ।
संसद बैठकमा बिना आधारमा कम्पनीका सयर मुल्य बढिरहेको उदाहरण दिदै आम जनतालाई ठगी गर्ने धन्दामा लागेका कम्पनीमाथि कडा निगरानी राख्न र उनीहरुमाथि छानबिन गर्नका लागि सरकारले एउटा समिति गठन गर्न माग गरेका छन् ।
उनले बुक भ्यालु सयभन्दा कम भएका कम्पनीको मूल्य अहिले तीन चार गुणासम्म बढेको बताउदै यसको नियमन गर्न सरकारको ध्यानाकर्षण गराएका छन् । उनले नेपाल फाइनान्स लिमिटेड, हाथवे इन्भेष्टमेन्ट, सिइडिबी हाइड्रो र एनआरएन इनफ्रास्ट्रक्चरको नामै लिएर यी सेयरमा सीमित व्यक्तिले कर्नरिङ, प्रोपोगाण्डा र सिन्डिकेट गरेर कृत्रिम मूल्य बढाएको भन्दै छानविन गरेर कारवाही गर्न माग गरे ।
