बिजखबर संवाददाता
११ पुस, काठमाडौं । व्यवसायीक कृषि तथा व्यापार आयोजना (प्याक्ट) ले माइक्रो ग्राण्डको प्रारम्भिक नजिता निकालेको छ । हाल कार्यालय प्रयोजनका लागि सवै प्रायजसो जिल्लाबाट प्रारम्भिक नजिता आएको र केही समयभित्रै पूर्ण रुपमा नतिजा प्रकाशित गरिने प्याक्टका आयोजना दिर्नेशक योगेन्द्रकुमार कार्कीले बताए । ‘हाल कार्यक्रम लागु भएका प्रायजसो जिल्लाको अवधारणपत्र जाँच गरेर नतिजा ल्याइसकेका छन्,’ उनले भने, ‘किसानहरुले जुन जिल्लाबाट अवधारण पत्र पेश गरेका छन् सोही जिल्लाका कृषि र पशुसेवा कार्यालयले नतिजा प्रकाशित गर्नेछन् ।’
प्रारम्भिक नतिजा अनुसार १ हजार ५ सय जना कृषिकहरुले आयोजना पाउने भएका छन् । लक्ष्यभन्दा बढी अवधारणापत्र परेकाले सहभागि भएका कृषिमध्ये उत्कृष्ट सवैलाई आयोजना दिन लागिएको कार्की बताउँछन् । ‘हामीले बढीमा ५ सय कृषकलाई यस आयोजनामा सहभागी गराउने उद्देश्यले कार्यक्रम ल्याएका थियौं,’ उनले भने, ‘काम गर्नका लागि ३ हजार २ सयभन्दा बढीले अवधारणापत्र पेश गरेकाले छानिएका सवैलाई दिने तयारी गरेका छौं ।’
प्याक्टले शुरुमा ५ सय परियोजनलाई प्रति आयोजनालाई अधिकतम १० लाख रुपैयाँका दरले ५० करोड रुपैयाँ वितरण गर्ने बताएको थियो । हाल आयोजना बढेपनि सोही अनुरुपमा पैसा दिनका स्रोत जुटाइसकेको कार्की बताउँछन् । ‘बढी परियोजना परेपछि विशेष प्राथमिकता दिएर बजेट बृद्धि गर्नका लागि विश्व बैंकसँग छलफल गरेका थियौं,’ उनले भने, ‘बजेट बृद्धि गर्नका लागि विश्व बैंक पनि तयार भएको छ ।’
माइक्रो ग्राण्डमा बढी आयोजना छनौट भएभन्दा पनि कतिले काम गर्छन भन्ने विषयमा भर पर्ने कार्कीको भनाइ छ । ‘हाल प्रति आयोजना १० लाख रुपैयाँ माग गरेर अवधारण पत्र पेश गरेका छन्,’ उनले भने, ‘काम गरेका आधारमा मात्र पैसा पाइने भएकाले बढीमा एउटा परियोजनाका लागि ६ लाख भन्दा बढी खर्च हुनेछैन ।’ साथै, तरकारी खेतीका लागि अवधारण पत्र पेश गर्नेका लागि बढीमा ३ लाख रुपैयाँभन्दा बढी नलाग्ने समेत प्याक्टले बताएको छ । हाल पेश भएका अवधारण पत्र अनुसार डेरी, मासुजन्य उद्योग तथा आयोजना मात्र बढी रकम खर्च हुने देखिएको छ ।
