काठमाडौं । उपत्यका भित्रका पेट्रोल पम्पमा एक्कासी बढेको सवारीको लाईन शनिवार केहि घटेको छ । बिहीवार र शुक्रवार उपत्यकाका थुप्रै पप्ममा पेट्रोल पाइएको थिएन भने पेट्रोल विक्री गर्ने पम्पमा सवारीको बाक्लो लाईन थियो ।
शुक्रवार निगमले ५ सय किलोलिटर पेट्रोल बजारमा पठाएपछि पेट्रोल पम्पमा लाईन घटेको देखिएको छ । यद्यपी, थुप्रै पेट्रोल पम्पमा ‘पेट्रोल नभएको’ सूचना टासिएको छ । शुक्रवार साविकभन्दा २ सय किलोलिटर पेट्रोल वितरण गरेका कारण लाईन अहिले बजारमा अभाव नभएको निगमका प्रबन्ध निर्देशक गोपालबहादुर खड्काले दाबी गरे ।
लगातार तीन दिनको सार्वजनिक विदाका कारण बजारमा पेट्रोलियम पदार्थको अभाव देखिएको छ । गत बिहीवार सार्वजनिक विदाका कारण आयल निगमले थानकोट डिपोबाट पेट्रोलियम पदार्थको आपूर्ती नगराउँदा बजारमा अभाव देखिएको हो । यद्यपी, शुक्रवार साविक भन्दा बढी पेट्रोल विक्री गरेका कारण बजारमा अभाव नदेखिने उनको भनाई छ ।
आज शनिवार पनि निगमले थानकोट डिपोबाट पप्महरुलाई पेट्रोल दिएको छैन । आईतवार पुनः लाईन बड्न सक्ने व्यवसायीहरु बताउँछन् ।
विदाका कारण बजारमा पेट्रोलको सहज उपलब्धता हुन नसकेको भएपनि आयात तथा विक्री वितरणमा कुनै समस्या नरहेको निगमको दाबी छ । भारतबाट सहजरुपमा आवश्यकमात्रामा पेट्रोल आईरहेको उनको दाबी छ ।
निगमले पेट्रोलियम पदार्थ उपलब्ध नगराएपछि बिहीवार राजधानीका थुप्रै पेट्रोल पम्प बन्द थिए । नेपाल प्रहरी र नेपाली सेनाका साथै केही पेट्रोल पम्पले मात्रै पेट्रोल विक्री गरेका थिए । पेट्रोलको अभाव देखिएपछि बिहीवार र शुक्रवार राजधानीका पम्पहरुमा तेलका लागि लाईन बस्नेको घुइचो थियो ।
हाल काठमाडौं उपत्यकाका लागि निगमको थानकोट डिपोबाट दैनिक ३ लाख लिटर पेट्रोल र ४ लाख लिटर डिजेल उपलब्ध गराउने गरेको छ । यद्यपी, अहिले पेट्रोलको माग साविकको तुलनामा उच्च रहेको खड्काले बताए । ‘अहिले उपत्यकामा पेट्रोलको खपत उच्चदरमा बढेको देखिएको छ’ उनले भने, ‘पहिला पहिला दैनिक ३ सय किलोलिटर भए पुग्थयो तर अहिले दैनिक ४ सय किलोलिटरसम्म खपत हुन थालेको छ ।’