काठमाडौं । ठेकेदारको लापरबाहीले पुरानो बसपार्कमा बन्ने भनिएको काठमाडौं भ्यु टावरको निर्माण अझै शुरु हुन सकेको छैन । काठमाडौं महानगरपालिका र ठेकेदार कम्पनी जलेश्वर, स्वछन्द विकोइकाबीच भएको सझौता अनुसार गत चैतदेखि काम शुरु गर्नुपर्ने भएपनि हालसम्म काम नै शुरु नभएको हो ।
पुरानो बसपार्कको टावर बन्ने क्षेत्रमा हाल जस्ताको बार लगाएर मात्र राखेको छ । महानगरपालिकाले बारम्बार घचघच्याइरहँदा पनि कम्पनीले अझसम्म निर्माण शुरु नगरेको महानगरका प्रवक्ता ज्ञानेन्द्र कार्कीले बताए । ‘ टावर बन्ने स्थान जस्तापाताले बारेर राखेकोले कानुनी रुपमा काम गरेको देखिन्छ,’ कार्कीले भने, ‘त्यसले गर्दा पनि कम्पनी विरुद्ध कदम चालिहाल्न सकिएको छैन ।’
तर महानगपालिकाले पहिलो चरणको कारवाही स्वरुप सोमवार ठेकेदार कम्पनीलाई प्रगती विवरण पेस गर्न भन्दै पत्राचार गरेको राजस्व शाखा प्रमुख महेश काफ्लेले जानकारी दिए । कम्पनीलाई हालसम्मको कामको प्रगती विवरण यही साउनको अन्त्यसम्म बुझाउन निर्देशन दिइएको समेत उनले बताए । ‘साउनभित्रै प्रगती विवरण पेस नगरेको अवस्थामा ठेक्का रद्धको प्रक्रिया अघि बढाइने छ,’ प्रवक्ता कार्कीले भने । करिव ४ महिना अघि टावर बनाउन भन्दै बसपार्कको पार्किङ खुल्लामञ्चमा सारिए पनि हालसम्म निर्माणको काम नै शुरु गरिएको छैन ।
यता ठेकेदार कम्पनीले भने जमिन खन्ने पाइलिङ मेसिन नेपालमा नपाइएकोले काम शुरु गर्न ढिलाई भएको बताउँदै आएको छ । जलेश्वर, स्वछन्द र विकोइका प्रवन्धक मनोज भेटुवालले पाइलिङ मेसिन भारतबाट ल्याउँदा काममा ढिलाइ भएको बताए ।
काठमाडौं महानगरपालिकाले यसअघि पनि चाँडै नै निर्माण कार्य शुरु नगरे पार्किङलाई पून बसपार्क सार्ने चेतावनी दिएको थियो । तर, सो चेतावनी पछि पनि काम शुरु नभएपछि अहिले फेरी प्रगती विवरण पेस गर्न पत्राचार गरेको हो । साउनभित्र प्रगतीविरण पेस नगरेको अवस्थामा सम्झौता रद्द गर्ने महानगरको चेतावनी छ । महानगर र कम्पनीले २ बर्षभित्र टावर निर्माण सम्पन्न गर्ने भन्दै सम्झौता गरेका थिए ।
२०७२ को शुरुबाट टावरको निर्माण शुरु गरिने भनिएपनि भुकम्पले काम रोकिएको थियो । पहिला २५ तले बनाउने भनिएकोमा भुकम्पपछि टावर १२ तलाको बनाउने निणर्य गरिएको हो । त्यस्तै त्यसपछि नाकाबन्दीले गर्दा काम शुरु हुन सकेन । कम्पनीले बनाउन लागेको १२ तले काठमाडौं भ्यु टावरको निर्माण शुरु गरेको १८ महिनामा सक्ने लक्ष्य राखेको छ ।
बसपार्कमा बहुउद्देश्यीय भवन बनाउने विषय तत्कालीन कार्यकारी अधिकृत गणेश राईले २०६८ सालमा जारी गरिएको काठमाडौ घोषणापत्र उल्लेख गरिएको थियो । त्यस लगत्तै अर्का कार्यकारी अधिकृत केदारबहादुर अधिकारीको कार्यकालमा प्रस्ताव माग गरिएको थियो । त्यस्तै अधिकारी पछिका कार्यकारी अधिकृत लक्ष्मण अर्यालको कार्यकालमा सो टावरको विषयमा लागत अध्ययन टोली गठन गरिएको थियो । तर, विभिन्न कानुनी तथा अन्य बाधाले गर्दा भवन निर्माणमा ढिलाइ भएको हो । अहिले महानगरका कार्यकारी अधिकृत रुद्रसिंह तामाङको कार्यकालमा पुनः सो कामलाई निरन्तरता दिइएको हो । तर कम्पनीले विभिन्न बहानामा काम शुरु गरेको छैन् ।
कम्पनीका प्रवन्धक भेटुवालका अनुसार सो टावरको लागत साढे ३ अर्व रुपैयाँ अनुमान गरिएको छ । बसपार्कमा बन्न लागेको टावरको निर्माण लागत सुरुमा ८१ करोड रुपैयाँ भनिएको थियो । नाकाबन्दी पछि सिमेन्ट, छडलगायत निर्माण सामग्रीको भाउ बढेकोले लागतमा बृद्धि भएको बताइएको छ ।
टावरले ओगट्नेमध्ये २० प्रतिशत स्थान पार्किङका लागि छुट्याइने बताइएको छ । टावरको सवैभन्दा तल अर्थात ग्राउन्ड फ्लोरमा अरनीको बसको पार्किङ र माथि २ ओटा तलामा उपत्यकाका सार्वजनिक सवारी तथा हलुका गाडीहरुको पार्किङ रहनेछ ।
सो भवनमा व्यवस्थित सिनेमा हल, थिएटर, स्वीमिङ पुल, रेष्टुराँ, बैंक तथा कामनपाको वडा कार्यालय समेत रहने उनले जानकारी दिए । नेपाली संस्कृति झल्कने विभिन्न स्वदेशी उत्पादनका साथै विदेशी सामग्रीहरु राखिने छ ।
सो भवन मौलिकपन झल्काउन सोही अनुरुपका बस्तुहरु प्रतिविम्वको रुपमा राख्ने बताइएको छ ।
काठमाडौं महानगरपालिकाले टावर निर्माणका लािग जलेश्वर, स्वछन्द र विकोइसँग सम्झौता गरेको हो । दुई पक्षबीच गत फागुन २२ गते अन्तिम हस्ताक्षर भएको थियो । सम्झौता अनुसार ति कम्पनीले आफ्नो लगानीमा भवन निर्माण गरी ३० बर्षसम्म चलाउनेछन् । त्यस्तै सुरु गरेको ५ वर्षभित्र सो टावर बनाइसक्नुपर्ने तथा त्सपछिका २५ बर्ष सञ्चालन अवधि रहनेछ । ३० बर्षपछी कम्पनीले सो भवन काठमाडौं महानगरपालिकालाई हस्तान्तरण गर्न पर्नेछ ।