काठमाडौं । नेपालमा पछिल्लो ११ महिनामा बैंक तथा वित्तीय संस्थाको शाखा संख्यामा ८ सय ९ ले बृद्धि भएको छ । विस २०७८ असार मसान्तमा १० हजार ६ सय ८३ शाखा संख्या रहेकोमा २०७९ जेठ मसान्तसम्म ११ हजार ४ सय ९२ शाखा पुगेका छन् ।
नेपाल राष्ट्र बैंकले सोमबार सार्वजनिक गरेको पछिल्लो ११ महिनाको तथ्यांकअनुसार बैंक तथा वित्तीय संस्थाको शाखा संख्यामा ठूलो बृद्धि हुँदापनि अझै ३ स्थानिय तह भने वित्तीय पहुँच बाहिर रहेका छन ।
उक्त तथ्यांक अनुसार २०७८ असार मसान्तमा ७ सय ५० स्थानीय तहमा वाणिज्य बैंकका शाखा पुगेको र २०७९ जेठ मसान्तसम्म पनि त्यतिनै स्थानीय तहमा उक्त पहुँच पुगेको जानकारी दिएको छ । यस्तै नेपाल राष्ट्र बैंकबाट इजाजत प्राप्त बैंक तथा वित्तीय संस्थाहरुको संख्या २०७९ जेठ मसान्तमा १ सय २७ रहेको छ ।
गत बर्षको सोहि अवधिमा ६ ओटा वित्तीय संस्था घटेको देखिन्छ । नेपालमा हाल वाणिज्य बैंक २७ ओटा, विकास बैंक १७ ओटा, वित्त कम्पनी १७ ओटा, लघुवित्त वित्तीय संस्था ६५ ओटा, पूर्वाधार विकास बैंक १ ओटा रहेका छन ।
