काठमाडौं । नेपाल राष्ट्र बैंकका गभर्नर महाप्रसाद अधिकारीले कोरोना महामारीपछि व्यवसायिक क्षेत्रमा भुक्तानीको ठुलो समस्या आईपर्ने बताएका छन् । उनले नेपाल चार्टर्ड एकाउन्टेन्टको संस्था (आईक्यान)ले आयोजना गरेको महामारीपछि जोखिम व्यवस्थापन र व्यवसायिक निरन्तरताको लागि प्रोफेसनल एकाउन्टेन्टहरुको भुमिका बिषयक छलफलमा उक्त कुराको जानकारी दिएका हुन । छलफलमा बोल्दै उनले यसरी भुक्तानीको समस्या विकराल हुँदा कोभिड–१९ पछिको आर्थिक पुनरुत्थान ज्यादै चुनौतीपूर्ण हुने बताए ।
गभर्नर अधिकारीले यो महामारीपछि व्यवसायिक क्षेत्रमा ऋणको भुक्तानीमा ठूलो समस्या आउनसक्ने र यसले बैंकिङ क्षेत्रलाई समेत प्रभावमा पार्नसक्ने बताएका हुन् ।
उनले श्रम बजार साँघुरो बन्दै गएको भन्दै नेपालमा औपचारिक र अनौपचारिक क्षेत्रका ४४ लाख मानिसहरु पनि यसको प्रभावमा परिसकेको बताए ।
‘‘वैदेशिक रोजगारीमा रहेकाहरु फर्कने सक्ने भएकाले यसले यो समस्या थप बढ्नसक्ने उनको भनाइ थियो ।
यसले रेमिट्यान्स घटाउने भएकोले बाह्य क्षेत्रको सन्तुलन प्रभावित हुनसक्ने उनको भनाइ थियो । हालसम्म यो महामारीले नेपालको कुल ग्राहस्थ उत्पादनको ४।३ प्रतिशत बराबरको नोक्सानी भएको प्रक्षेपण गरिएको बताए ।
यस्तै उनले राष्ट्र बैंकले यो महामारीको प्रभावको न्यूनीकरणका लागि पटकपटक विभिन्न कार्यक्रम ल्याइसकेको भन्दै अबका दिनहरूमा बैंक दर घटाउने, ब्याजको पुँजीकरण गर्ने, ऋणको सीमा बढाउने जस्ता कार्यक्रमहरु ल्याउने बताए ।
