काठमाडौं । चालु आर्थिक वर्षको फागुन मसान्तसम्म नेपालको कुल सार्वजनिक ऋण दायित्व २६ खर्ब ७६ अर्ब नाघेको छ । सार्वजनिक ऋण व्यवस्थापन कार्यालयले सार्वजनिक गरेको तथ्यांक अनुसार चालु आवको सुरुवातमा २४ खर्ब ३४ अर्ब ९ करोड रहेको सार्वजनिक ऋण फागुनसम्म २ खर्ब ४१ अर्ब ९३ करोड थप भएको हो । यो नेपालको कुल गार्हस्थ्य उत्पादन (जीडीपी) को ४६.९१ प्रतिशत हुन आउँछ।
यस अवधिमा विनिमय दरमा भएको परिवर्तनका कारण सार्वजनिक ऋण दायित्वको वृद्धिमा ६६ अर्ब २९ करोडको प्रभाव परेको कार्यालयले जानकारी दिएको छ । कुल सार्वजनिक ऋणमा फागुन मसान्तसम्म वैदेशिक ऋणको हिस्सा ५०.८३ प्रतिशत तथा आन्तरिक ऋणको हिस्सा ४९.१६ प्रतिशत रहेको छ।
चालु आर्थिक वर्षमा सरकारले कुल ५ खर्ब ४७ अर्ब सार्वजनिक ऋण परिचालन गर्ने लक्ष्य राखेकोमा फागुन मसान्तसम्ममा ३ खर्ब ३४ अर्ब ६२ करोड ऋण मात्र प्राप्त भएको छ। यो लक्ष्यको ६१.१७ प्रतिशत मात्र हो। यसमध्ये आन्तरिक ऋण प्राप्तिको प्रगति ८१.५६ प्रतिशत र बाह्य ऋण प्राप्तिको प्रगति ३०.१७ प्रतिशत रहेको छ।
चालु आर्थिक वर्षका लागि ऋण सेवा भुक्तानी खर्चका लागि ४ खर्ब २ अर्ब ८५ करोड बजेट विनियोजन गरिएको थियो। फागुन मसान्तसम्म २ खर्ब १ अर्ब ७२ करोड भुक्तानी भइसकेको छ, जुन कुल बजेटको ५०.०८ प्रतिशत हो।
यो रकम कुल गार्हस्थ्य उत्पादनको ३.५४ प्रतिशत बराबर रहेको छ। विशेषगरी, वैदेशिक ऋणको भुक्तानीमा विनिमय दरको उतारचढावले थप प्रभाव पारेको देखिन्छ।
