काठमाडौं । चालु आर्थिक बर्ष २०८१/८२ को कात्तिक मसान्तसम्म नेपालमा कुल विदेशी मुद्रा सञ्चिति २२ खर्ब ५५ अर्ब ३५ करोड रुपैयाँ पुगेको छ ।
गत आर्थिक बर्षको तुलनामा १०.५ प्रतिशतले बढ्दै यसपल्ट विदेशी मुद्रा संचितिले आगामी १८ महिनाको वस्तु र १५.१ महिनाको वस्तु तथा सेवा आयात धान्न पर्याप्त रहने राष्ट्र बैंकले जानकारी दिएको छ । केन्द्रिय बैंकले मासिक प्रतिवेदन सार्वजनिक गर्दै अमेरिकी डलरमा पनि विदेशी मुद्रा सञ्चिति ९.४ प्रतिशतले बढेर १६ अर्ब ७० करोड पुगेको जानकारी दिएको छ ।
नेपालमा भएको कुल विदेशी मुद्रा संचितिमध्ये नेपाल राष्ट्र बैंकसँगको सञ्चिति ८.६ प्रतिशतले बढेर २० खर्ब ८ अर्ब १५ करोडमा पुगेको छ भने बैंक तथा वित्तीय संस्थाहरूको सञ्चिति २८.४ प्रतिशतले बढेर २ खर्ब ४७ अर्ब २० करोड कायम भएको छ। कुल सञ्चितिमा भारतीय मुद्राको अंश २२ प्रतिशत रहेको छ। विदेशी विनिमय सञ्चितिको यो वृद्धि देशको आर्थिक स्थायित्वका लागि सकारात्मक मानिएको छ।
