काठमाडौं । नेपालको सिमेन्ट उद्योग आर्थिक मन्दी र निर्माण क्षेत्रमा देखिएको मन्दीका कारण चुनौतीपूर्ण समयबाट गुज्रिरहेको छ। यद्यपि, शिवम् सिमेन्ट्सले नाफा कायम राख्दै आफ्नो स्थिरता र विश्वसनीयता प्रमाणित गरेको छ। चालु आर्थिक वर्षको पहिलो त्रैमासमा सिमेन्ट कम्पनीहरूको वित्तीय विवरणहरु कमजोर देखिए पनि शिवम् सिमेन्ट्सले भने १ करोड २७ लाख रुपैयाँ नाफा आर्जन गर्दै अग्रणी हुन रह्यो ।
शिवम् सिमेन्ट्सले शेयरधनीका लागि प्रतिफलको उच्च सम्भावना देखाएको छ। कम्पनीको ९५ करोड ६२ लाख रुपैयाँ सेयर प्रिमियम खातामा रहेको छ, जसले डबल डिजिट लाभांश वितरणको क्षमता उजागर गर्दछ। आर्थिक मन्दीका बावजुद पनि यसको सकारात्मक प्रतिसेयर आम्दानी (इपीएस) र १८९.२८ रुपैयाँको प्रतिसेयर नेटवर्थले लगानीकर्ताका लागि बलियो आधार प्रस्तुत गरेको छ।
शिवम् सिमेन्ट्सले गुणस्तरलाई आफ्नो प्राथमिकतामा राख्दै ४३ र ५३ ग्रेडका ओर्डिनरी पोर्टल्याण्ड सिमेन्ट उत्पादन गरिरहेको छ। नेपाल स्ट्यान्डर्ड अनुसार निर्माण गरिएको यस सिमेन्टले देशकै पहिलो गुणस्तर पुरस्कार प्राप्त गर्न सफल भएको छ। यसले हालसम्म १३ करोड ३१ लाख बोरा सिमेन्ट बिक्री गर्दै देशको सबैभन्दा धेरै बिक्री हुने ब्रान्डको रूपमा आफ्नो स्थान सुरक्षित गरेको छ। कम्पनीले भारतमा पनि आफ्नो निर्यात सुरु गरेको छ, जसले यसको बजार विस्तार र अन्तर्राष्ट्रिय प्रतिस्पर्धामा उपस्थिति बलियो बनाएको छ।
शिवम् सिमेन्ट्सले होङ्शी होल्डिङ्ससँगको साझेदारीमार्फत ३० प्रतिशत हिस्सेदारी कायम गरेको छ, जसले कम्पनीलाई नेपालका सिमेन्ट बजारमा अझ बलियो बनाएको छ। सहायक कम्पनीहरूमा ४ अर्ब ५८ करोड रुपैयाँको लगानीले पनि कम्पनीको वित्तीय आधारलाई मजबुत बनाएको छ ।
कम्पनीले चालु आर्थिक बर्षको पहिलो त्रैमासमा १ अर्ब ४० करोडको बिक्री आय आर्जन गरेको छ। यद्यपि, गत वर्षको तुलनामा बिक्री घटेको भए पनि खर्च व्यवस्थापन र अन्य आम्दानी (१० करोड ५७ लाख रुपैयाँ) मा भएको वृद्धिले नाफा सुनिश्चित गरेको छ। कम्पनीको स्टक मूल्य हाल ओभरसोल्ड अवस्थामा रहेको देखिन्छ।
पूँजी बजारका जानकारहरुका अनुसार शिवम् सिमेन्ट्स जस्तो फन्डामेन्टल रूपमा बलियो कम्पनीमा लगानी गर्दा लाभांश र पूँजी वृद्धिको उच्च सम्भावना रहन्छ । शिवम् सिमेन्ट्सले आफ्नो लगानीकर्तालाई स्थिर प्रतिफल प्रदान गर्दै र उपभोक्ताको गुणस्तरको अपेक्षा पूरा गर्दै नेपालमा सिमेन्ट उद्योगको नेतृत्व लिइरहेको छ।
