काठमाडौं । नेपाल उद्योग वाणिज्य महासंघले आगामी मंसिर २५ गतेलाई विशेष साधारणसभाको मिति तय गरेको छ । महासंघको विधान संशोधनका लागि आज बसेको कार्यसमिति बैंठकले मंसिर २५ गतेका लागि विशेष साधारणसभा बोलाएको हो ।
महासंघको यसअघि बसेको कार्यसमिति बैठकले विधान संशोधन प्रस्ताव सर्वसम्मतिले पारित गरेको थियो । उक्त बैठकले हालका वरिष्ठ उपाध्यक्ष अञ्जन श्रेष्ठ पछिको एक कार्यकालको लागि वरिष्ठ उपाध्यक्षकै लागि निर्वाचन हुने र त्यसपछि अध्यक्षको प्रत्यक्ष निर्वाचित हुनेगरी सर्वसम्मतिले विधान संशोधन गरेको थियो । उदाहरणका लागि हालका अध्यक्ष चन्द्रप्रसाद ढकालपछि वरिष्ठ उपाध्यक्ष अन्जन श्रेष्ठ महासंघको अध्यक्ष हुनेछन् भने त्यसपछिको एक कार्यकाल पनि वरिष्ठ उपाध्यक्षकै लागि निर्वाचन गरिने र त्यसपछि मात्रै प्रत्यक्ष निर्वाचित अध्यक्ष चयन गरिने भएको छ । महासंघले उक्त मस्यौदालाई नै आगामी मंसिर २५ मा हुने विशेष साधारणसभामा पेश गर्नेछ ।
यसैगरी महासंघको तत्कालीन बैठकले विधान संशोधनअन्तर्गत दुईवटा वरिष्ठ उपाध्यक्ष राख्ने प्रस्ताव पारित गरेको थियो । जसअनुसार वस्तुगत र एसोसिएटबाट एउटा वरिष्ठ उपाध्यक्ष र जिल्ला नगरबाट एउटा वरिष्ठ उपाध्यक्ष रहनेछन् । हाल कार्यसमितिबाट पारिस भएको मस्यौदा अनुसार उक्त व्यवस्था अन्जन श्रेष्ठ अध्यक्ष भएर त्यसपछि एक कार्यकालको लागि पुन वरिष्ठ उपाध्यक्षको लागि निर्वाचन भएर प्रत्यक्ष निर्वाचनमा गएपछि मात्र लागु हुनेछ ।
महासंघले हाल उक्त विधानको मस्यौदालाई अध्ययनका लागि आफ्ना जिल्ला नगर वस्तुगत एसोसिएट सदस्यलाई अध्ययनका लागि पठाएको छ । महासंघले आफु अन्तरगतका सदस्यहरुबाट राय लिएर उक्त मस्यौदालाई आगामी मंसिर २५ गते हुने विशेष साधारणसभाबाट पारित गराएपछि कार्यान्वयनमा लैजाने छ ।
