काठमाडौं । उद्योगमन्त्री सोमप्रसाद पाण्डेले औद्योगिक व्यावसायिक ऐन चाँडो ल्याउने गृहकार्य भइरहेको बताएका छन् ।
नेपाल कुरियर सेवा संघको २१औँ वार्षिक साधारणसभामा उनले यस्तो जानकारी दिएका हुन् । साथै सो ऐन सदनमा रहेकाले संशोधनका लागि आवश्यक सुझाव दिन व्यवसायीलाई आग्रह गरे ।
मन्त्री पाण्डेले समाजमा कुरियर सेवाको महत्व बढ्दै गएकाले त्यसलाई व्यवस्थित बनाउन आफूले सहयोग गर्ने प्रतिबद्धता व्यक्त गरे ।
सो अवसरमा नेपाल चेम्बर अफ कमर्सका उपाध्यक्ष ज्ञानेन्द्ररत्न तुलाधर, नेपाल उद्योग वाणिज्य महासङ्घका उपाध्यक्ष दिनेश श्रेष्ठलगायतले अहिले भइरहेको इन्धन अभावले उद्योगधन्दालाई नराम्ररी प्रभावित पारेकाले चाँडै त्यसको विकल्प खोज्न सरकारसँग आग्रह गरे।
