बिजखबर संवाददाता
७, मंसिर, काठमाडौं । चौधरी ग्रुपले मध्य मोदी (मिडिल मोदी) जलविद्युत् आयोजना निर्माण गर्ने भएको छ । चौधरी ग्रुपका अध्यक्ष विनोद चौधरीले आइतवार एक कार्यक्रमबीच उक्त जलविद्युत् आयोजनाको शिल्यान्यास गरेका छन् । नेपाल जल विद्युत् पूर्वाधार तथा विकास लिमिटेडले यस परियोजना विकास गर्नेछ । चौधरी ग्रुप र कोस्टल इन्डिया यस कम्पनीका मुख्य साझेदार हुन् ।
मध्य मोदी जल विद्युत् परियोजना निर्माणस्थल पर्वत जिल्लाको भुकताङ्ले–१ भुरुङडाँडामा छ भने पावर हाउस पर्वत जिल्लाको देउवापुर–२ मानिनश्वाँरामा रहनेछ । यस परियोजनाको विद्युत् उत्पादन क्षमता १५.१ मेगावाटको हुनेछ । उक्त आयोजना निर्माणको जिम्मा हिमाल हाईड्रो एण्ड जनरल कन्स्ट्रक्सन लिमिटेडले पाएको छ । कम्पनीले मध्य मोदी जल विद्युत् परियोजना निर्माण प्रारम्भ भएको तीन बर्षभित्र सम्पन्न गर्ने लक्ष्य छ । यस परियोजनाको लागत करिब दुई अर्ब ८० करोड रुपैयाँ रहने अनुमान गरिएको छ ।
मोदी खोलामा ‘रन अफ रिभर’ मोडलमा निर्माण हुने यस परियोजनाको विद्युत् २.४ किलोमिटर लामो १३२ केभी प्रशारण लाईनमार्फत केरुङ्गामा ल्याई नेशलन ग्रिडमा जोडिनेछ । निकट भविष्यमै चौधरी ग्रुपले साझेदारहरुसँगको सहकार्यमा ४४ मेगावाट क्षमताको सुपर मादी जलविद्युत् परियोजना निर्माणको तयारी समेत गरिरहेको छ ।
शिल्यान्यस कार्यक्रममा बोल्दै चौधरीले नेपालको जल विद्युत् परियोजनामा लगानी गर्ने आफ्नो सपना पुरा हुन लागेको बताएका छन् । ‘जलविद्युत् आयोजनामा लगानी गर्न पाउँदा खुशी भएको छु,’ चौधरीले भने, ‘उक्त आयोजना निर्माण भएपछि देशका लागि अत्यावस्यक रहेको विद्युत् आपूर्तिमा थोरै भए पनि योगदान पु¥याउने छ ।’
सन् २००८ मा चौधरी ग्रुपले अन्तर्राष्ट्रिय लगानीकर्ताहरुसँगको साझेदारीमा करिब १ हजार ५ सय मेगावाट जल विद्युत् उत्पादन क्षमता भएका परियोजनाहरुमा लगानी गर्ने निर्णय लिइसकेको थियो । तर, त्यतिबेला देशभित्र लगानीको वातावरण बन्न नसक्दा साझेदार अन्तर्राष्ट्रिय लगानीकर्तासँगै पछि हट्नु परेको चौधरीले बताए । ‘त्यतिखेर अगाडि बढाइएका परियोजनाहरु सम्पन्न गर्न सकिएको भए सायद अहिले आम नेपाली नागरिकले दैनिक १६ घण्टाको लोडसेडिङ भोग्नुपर्ने थिएन,’ कार्यक्रममा चौधरीले भने ।
