काठमाडौं महानगरपालिकाले बस खरीदको जिम्मा साझा यातायातलाई नै दिने भएको छ । साझाले बस किन्दा कर कम पर्ने भन्दै महानगर बोर्ड बैठकले कात्तिक ११ गते यस्तो निणर्य गरेको हो ।
महानगरले १० करोड रुपैयाँ बराबरका ठूला बस खरिद गरेर साझा यातायातलाई हस्तान्तरण गर्ने तयारी गरेको थियो । ‘सोहि अनुसार १० करोड रुपैयाँ साझालाई दिएर बस खरीद गर्न लगाउने महानगरका पिपीपी शाखा प्रमुख शिव अधिकारीले बताए ।
महानगर र साझा यातायातले गत साउन २६ गते १० करोड रुपैयाँ बराबरका सुविधासम्पन्न बस खरिद गरेर साझालाई हस्तान्तरण गर्ने सम्झौता गरेको थियो ।
सहरी यातायातलाई सेवामुखी बनाउने उद्देश्यका साथ महानगरले साझालाई ६ महिनाभित्र बस खरिद गरेर स्वामित्व हस्तान्तरणको सम्झौता गरेका थिए।
अधिकारीका अनुसार असोज १२ गते अपांगमैत्री र कम्तीमा ४० सिट क्षमताका बस खरिद गर्न ग्लोबल टेन्डर गरेको थियो ।
तिहारपछि सम्झौता पुनरावलोकन गरेर साझाले बस किन्ने प्रक्रिया सुरु गर्न सक्ने उनले जानकारी दिए । १० करोड रुपैयाँमा हाम्रो मापदण्डका करिब २५ वटा ठूला बस आउनेछन् उनले भने सोहि अनुसार महानगरले रकम हस्तान्तरण गर्ने छ ।
साझाले पनि महानगरलाई बसको मूल्यअनुसार सेयर दिने निर्णय गरिसकेको छ। साझाले काठमाडौं र ललितपुर जिल्लाका दुई रुटमा १६ वटा बस सञ्चालन गरिरहेको छ।
