काठमाडौं । एमजी कम्पनीका लागि नेपालको आधिकारिक बिक्रेता कम्पनी पारामाउन्ट मोटर्स प्रालि एमजीएचएस ब्राण्डको प्रिमियम एसयूभी कारको अग्रिम बुकिङ खुला गरेको छ । ‘अल न्यू स्टाइलिस एसयूभी’ कारको रुपमा कम्पनीले नेपाली बजारमा भित्र्याउन लागेको एमजी एचएसमा सुरक्षाका आवश्यक सबै मापदण्ड पूरा रहेको र एचएसमा अगाडि ड्यूल र साइड कटन एयर व्याग दिइएको पारामाउन्ट मोटर्सले जनाएको छ ।
बिक्रेता कम्पीका अनुसार कारलाई चालकमैत्री बनाउन लेड डिपार्चर वार्निङ सिस्टम, ब्लाइन्ड स्पट डिटेक्सन, ३६० डिग्री क्यामेरा, अटो होल्ड, इलेक्ट्रीक पार्किङ ब्रेक, अगाडि र पछाडि चारै चक्कामा डिस्क ब्रेक, एन्टी ट्रायाप सहितको पानारोमिक सनरुफ, ६ तरिकाबाट आफू अनुकुल बनाउन सकिने ड्राइभिङ सिट रहेका छन् ।
त्यस्तै, यात्रुमैत्री बनाउन ४ तरिकाले मिलाउन मिल्ने यात्रु सिट, अगाडिका दुबै सिट तातो बनाउन मिल्ने, अटोमेटिक फोल्ड हुने र चिसोमा तातो बनाउन मिल्ने आउट साइड रियर भ्यू मिरर जस्ता विशेषता यो कारमा उपलब्ध छन् ।
कम्पनीका अनुसार १०.१ इन्चको इन्फोटेन्टमेन्ट सिस्टम यसमा रहेको छ । यसले एप्पल कार प्ले र एन्ड्रोइड सिष्टम अटो सपोर्ट हुन्छ । १८ इन्चको अलोय ह्वील र पूर्ण रुपमा लेदर सिटले गाडीको इन्टेरियर र एक्सटेरियर दुबैलाई प्रिमियम बनाएको कम्पनीले जानाएको छ ।
एमजीएचएसमा १.५ लिटर टर्बो इन्जिन रहेको छ । उक्त इन्जिनले अधिकतम ५६०० आरपीएममा १५२ पीएस पावर र १७०० देखि ४४०० आरपीएममा २५० एनएमपिक टर्क प्रदान गर्ने जनाएको छ । यसमा ७ स्पीड डिसिटी गियरबक्स उपलब्ध छन् ।
यसलाई नेपाल ल्याएको अवसर पारेर केही समय कम्पनीले ७९ लाख ९९ हजार रुपैयाँ मूल्य तोकेर विक्री सुरु गर्न लागेको हो ।
कालो, सेतो र रातो रंगमा यो कार उपलब्ध छ । अहिले बुकिङ गर्ने ग्राहकलाई आगामी मार्च दोस्रो सातासम्ममा डेलिभरी दिइने कम्पनीले जनाएको छ । पुरानो गाडीलाई एक्सचेन्ज गर्न चाहनेहले समेत यो कार बुकिङ गर्न सक्ने कम्पनीले जनाएको छ ।
