काठमाडौं । नेपाल व्यवस्थापन संघको शुक्रबार सम्पन्न ३९ औं वार्षिक साधारणसभाले नयाँ नेतृत्व चयन गरेको छ । जसमा किरण कुमार श्रेष्ठ सबैभन्दा बढी ३८९ मत ल्याएर कार्यसमिति सदस्यमा व्यक्तिगततर्फ विजयी भएका छन् ।
उनले यस वर्षको उत्कृष्ठ व्यवस्थापक अवार्ड पनि पाएका छन् । त्यस्तै, धर्मानन्ध अधिकारीले ३६८, अनु जोशीले३६४ र सुमन पोखरेलले ३५८ मत पाएर विजयी भएका छन् ।
त्यसैगरी हेमा अधिकारीले ३१२, इन्द्रकुमार श्रेष्ठले ३०९, मनिष झाले ३०१, आशा राणा अधिकारीले २९५, सुजन आचार्यले २७४, मिलन श्रेष्ठले २७०, मोहन ओझाले २५४ मत पाएर निर्वाचित भएका छन् ।
मोहन ओझाको भन्दा २ मत कम पाएर सरोज कुमार प्रधान पराजित भएका छन् । उमेदवार योगराज कँडेलले १८७, अजय कुमार मिश्रले १९३ राजन थापाले १९३ र रमेश भण्डारीले १५४ मत पाएका छन् ।
व्यक्तिगत समूहबाट ११ जना निर्वाचित हुनुपर्नेमा १६ जनाको उम्मेदवारी परेको थियो । संघमा करिब ६०० सदस्य भएपनि जम्मा ४६७ मत खसेको थियो ।
सस्थागत तर्फ नेपाल राष्ट्र बैंकका बंमबहादुर मिश्र, राष्ट्रिय वाणिज्य बैंकका कविराज अधिकारी, कर्मचारी संचय कोषका तुलसीराम गौतम, कर्मचारी संचय कोषका रमण नेपाल, राष्ट्रिय बीमा संस्थानका कवि पाठक र शिवम सिमेन्ट निर्वाचित भएका छन् ।
संस्थागत तर्फबाट ६ सदस्य निर्वाचित हुनुपर्नेमा सरकारी संस्थाहरु हावी भएका छन् । संस्थागततर्फ निजी क्षेत्रबाट शिवम् सिमेन्ट मात्र निर्वाचित भएको छ ।
सरकारी नेपाल बैंक पराजित भएको छ भने सीजी फुड्स्, नेविको विष्कुट पनि पराजित भएका छन् । सोमबार बस्ने नयाँ कार्यसमितिको बैठकले अध्यक्षसहित पदाधिकारी चयन गर्ने कार्यक्रम रहेको वर्तमान अध्यक्ष सुशील भट्टले जानकारी दिए ।
सम्मेलनको उद्घाटन अर्थमन्त्री डा युवराज खतिवडाले गरेका थिए । संघले आफ्नो बार्षिक साधारण सभाको अवसरमा एक मुख्य विषयमा केन्द्रित रही राष्ट्रिय व्यवस्थापन सम्मेलनको आयोजना गर्ने परम्परा कायम गर्दै आएको छ । यस बर्षको राष्ट्रिय व्यवस्थापन सम्मेलनको मुख्य बिषय तथ्यांक परिचालित निर्णय प्रक्रिया रहेको थियो ।
व्यवसायिक सत्रको रुपमा रहने यस सम्मेलनमा चारवटा कार्यपत्रहरु प्रस्तुत भएका थिउ । व्यवसायिक सत्रमा तथ्यांकविद डा आशुतोषमणि दीक्षित र भारतको आदित्य विरला समूह द ग्रुप अफ एक्जुकेटिभ प्रेसिडेन्ट कर्पोरेट स्ट्राटेजी एण्ड विजनेसका डी शिवकुमारले अतिथि वक्ताको रुपमा र प्रधानमन्त्री केपी शर्मा ओलीका सूचना प्रविधि सल्लाहकार असगर अलीले विषयमा र विश्व बैक समूह(टीबीसी)का नेपाल म्यानेज फ्रेन्च ब्रेस्टीले सार्वजनिक बित्त व्यवस्थापनका विषयमा आफ्ना प्रस्तुति दिएका थिए ।
कार्यक्रममा नेपाल पर्यटन बोडको तर्फबाट पर्यटन प्रबर्धनमा व्यवस्थापकहरुको भूमिका र नेपाल भ्रमण बर्ष २०२० विषयमा प्रस्तुतीकरण दिइएको थियो ।
सम्मेलनको समुदघाट्न शत्रमा प्रमुख अतिथि अर्थमन्त्री खतिवडाले नेपाल व्यवस्थापन जर्नलको विमोचन पनि गरेका थिए ।
नेपाल व्यवस्थापन संघका सभापति तथा राष्ट्रिय योजना आयोगका सदस्य माननीय सुशील भट्टको सभापतित्वमा साधारसभा सम्पन्न भएको थियो । व्वस्थापन सम्मेलन समारोहमा प्रथम उपसभापति बमबहादुर मिश्रले स्वागत मन्तब्य राख्दै नेपाल व्यवस्थापन संघको संक्षिप्त परिचयसहित ब्यवस्थापन सम्मेलनको उद्देश्यमाथि प्रकाश पारेका थिए ।
यो उद्घाटन सम्मेलनको अवसरमा विश्व र नेपालको व्यवस्थापन विकासको परिदृष्य २०१९ एक अनुसन्धानात्मक कृतिको पनि विमोचन गरिएको थियो । यसका विविध पक्षहरुको सम्बन्धमा व्यवस्थापन विज्ञद्धय नरोत्तम अर्याल र प्रशन्न पोखरेलले प्रस्तुति दिएका थिए ।
सम्मेलनको समापनको अवसरमा प्रमुख अतिथि डा. युवराज खतिवडा र नेपाल व्यवस्थापन संघका सभापति तथा राष्ट्रिय योजना आयोगका सदस्य ई सुशील भट्टले संबोधन गरेका थिए ।
सम्मेलनमापछि राष्ट्रिय व्यवस्थापन पुरस्कार तथा सम्मान कार्यक्रम, १९ औं कार्यसमितिको निर्वाचन र एशियाका राष्ट्रिय व्यवस्थापन संघहरुको छाता संगठनको रुपमा रहेको एशियाली व्यवस्थापन संघले एशियाली नेतृत्व पुरस्कार साँझको आयोजना गरिएको थियो ।,
नेपालका व्यवस्थापकहरुलाई संगठित गर्ने, उनीहरुको सामूहिक हित रक्षाको लागि आवश्यक नीति र नियमहरु बनाउने, व्यवस्थापकहरुको वृत्ति विकासका अवसरहरु सिर्जना गर्ने, विश्वमा प्रतिपादित व्यववस्थापनका नवीन सिद्धान्त, ज्ञान, सीप र अभ्यासहरुलाई अबलम्बन गर्दै संस्थाहरुमा सुव्यवस्थापनका माध्यमबाट सुशासन कायम गर्दै देशको आर्थिक तथा सामाजिक विकासलाई सघाउने उद्देश्यले २०३७ सालमा नेपाल व्यवस्थापन संघको स्थापना भएको हो ।
स्थापनाको ३९ बर्षको अवधिमा यस संघले राष्ट्रिय स्तरमा सरकारको नीति निर्माणका विभिन्न तहमो सल्लाहकारको भूमिका पनि प्राप्त गरेको छ भने अन्तर्राष्ट्रियस्तरमा यसले विभिन्न ११ राष्ट्रका राष्ट्रिय व्यवस्थापन संघ तथा विभिन्न क्षेत्रीय व्यवस्थापन संघको सदस्यता प्राप्त गरी कार्यगत सम्बन्ध स्थापित गरेको छ ।
संघले आफ्नो भगिनी संस्थाको रुपमा व्यवस्थापन विकास केन्द्रको स्थापना गरेको छ । यसले अध्ययन,अनुसन्धान र परामर्शदाताको समेत काम गरेर संस्थाहरुको सुधार र आर्थिक सामाजिक विकासका प्रयासहरुलाई उपलब्धिमूलक बनाउन सक्रिय भूमिका निर्वाह गर्दै आएको छ । त्यस्तै व्यवस्थापनको क्षेत्रमा आवश्यक दक्ष जनशक्ति उत्पादन गर्ने उद्देश्यले संघले व्यवस्थापन विकास क्याम्पस पनि सञ्चालन गर्दै आएको छ ।
इएमबीए स्तरको अध्यापनमार्फत दक्ष जनशक्ति उत्पादन गरेर नेपालको सार्वजनिक र निजी क्षेत्रलाई योग्य व्यवस्थापकहरु आपूर्ति गर्न यसले सघाइरहेको छ । यसबाहेक संघले आवश्यकता र मागमा आधारित भएर विभिन्न किसिमका अल्पकालीन र मध्यकालीन तालिमहरु पनि सञ्चालन गर्दै आइरहेको छ ।
संघले नीति निर्माण र कार्यान्वयनमा सघाउने अभिप्रायले स्थापना कालदेखि नै बार्षिक नीति तथा कार्यक्रम र बजेटका सम्बन्धमा आम जनता र सरोकारवाला निकायका बीचमा संवाद गरी उपयुक्त सुझाव दिने उद्देश्यले पूर्व बजेट गोष्ठी र बजेट समीक्षा गोष्ठी गर्दै आएको छ । त्यसैगरी निजी क्षेत्र र आम नागरिकको जीवनमा असर गर्ने मौद्रिक नीतिका सम्बन्धमा पनि गोष्ठीहरु गर्दै आएको छ ।
