काठमाडौं । सर्वोच्च अदालतले लुम्बिनी क्षेत्रमा नयाँ उद्योग खोल्न रोक लगाएको छ । सर्वोच्च अदालतका न्यायाधीश तेजबहादूर केसी र मनोनकुमार शर्माको संयुक्त इजलाशले विश्व सम्पदा सूचीमा सुचिकृत लुम्बिनी क्षेत्रमा नयाँ उद्योग खोल्न तथा मालबाहक सवारीसाध प्रवेशमा रोक लगाउन अन्तरिक आदेश दिएको हो ।
उद्योग तथा ठूला सवारीसाधनले विश्व सम्पदा सूचीमा सुचिकृत लुम्बिनीको मौलिकता नै संकटमा परेको भन्दै रिट परेको थियो । उक्त रिटमाथी सुनुवाई गर्दै आईतबार नयाँ उद्योग खोल्न तथा मालबाहक सवारीसाधन प्रवेशमा रोक लगाउन आदेश दिएको हो ।
उक्त आदेश अनुसार अबका दिनमा लुम्बिनीको १५ किलोमिटर वरपर नयाँ उद्योग खोल्न पाईने छैन भने २० टनभन्दा माथीका मालबाहक सवारीसाधन प्रवेश गर्न पाईनेछैन ।
यसैगरी यस अघि खुलेका उद्योग र सोको वायु प्रदुषणको विषयमा अध्ययन गर्न कमिति गठन गर्न समेत आदेश दिएको छ । वातावरणविद् संलग्न सो समितिले ४ महिना भित्र अध्ययन प्रतिवेदन बुझाउनु पर्ने छ ।
