काठमाडौं । जोशी हाइड्रो पावर कम्पनीले १४ करोड ४८ लाख ४६ हजार रुपैयाँ बराबरको साधारण शेयर(आइपिओ) बिक्री गर्ने भएको छ ।
कम्पनीले यही मङ्सिर १६ गतेदेखि साधारण शेयर बिक्रीको तयारी गरेको हो । कम्पनीको शेयर छिटोमा मङ्सिर १९ गतेसम्म र ढिलोमा आगामी पुस १६ गतेसम्म रहेको छ । नेपाल धितोपत्र बोर्डले सो कम्पनीलाई गत कात्तिक १८ गते साधारण शेयर बिक्रीका लागि अनुमति प्रदान गरेको हो । कम्पनीको शेयर बिक्री प्रबन्धकमा सिद्धार्थ क्यापिटल लिमिटेड रहेको छ ।
आयोजना प्रभावित क्षेत्रका लागि कम्पनीले ३ लाख ७१ हजार ४ सय कित्ता अर्थात् ३ करोड ७१ लाख ४० हजार बराबरको शेयर छुट्याएको थियो । त्यसमा प्रति शेयर १ सय अंकित दरको १ लाख २९ हजार ३ सय ९० कित्ता मात्रै आवेदन परेको थियो ।
स्थानीयबासीले आवेदन नगरेको शेयर समेत आम सर्वसाधारणलाई बिक्री गरिनेछ । कम्पनीले इलाममा ३ मेगावाट क्षमताको माथिल्लो पिलुवा १ जलविद्युत् आयोजना सञ्चालनमा ल्याएको छ ।
आयोजनाको कूल लागत ५५ करोड ३५ लाख रुपैयाँ रहेको छ । यस आधारमा प्रतिमेगावाट लागत १८ करोड ४५ लाख रुपैयाँ रहेको छ ।
आयोजनाले विद्युत विकास विभागबाट २०७० साल जेठ १२ गते विद्युत उत्पादन अनुमति प्राप्त गरेको थियो । त्यसआधारमा सो आयोजनाको स्वामित्व ३१ वर्ष कम्पनीको नाममा रहनेछ ।
आयोजनाको सर्व साधारणमा लगानी फिर्ता हुने अवधि ११ वर्ष रहेको छ । आर्थिक अवस्थाको विश्लेषण गर्ने इक्रा नेपालकाअनुसार कम्पनीको अवस्था कमजोर रहेको छ ।
