काठमाडौं । माथिल्लो तामाकोशी जलविद्युत आयोजनाले स्थानीयको लागि छुट्याएको १० प्रतिशत सेयर आज बाँडफाँड हुने भएको छ ।
आयोजनाले स्थानीय दोलखाबासीका लागि जारी गरेको सेयर आज दिउँसो ३ बजे बाँडफाँड हुने आयोजनाका प्रवक्ता गणेश न्यौपानेले जानकारी दिएका छन ।
उनका अनुसार क,ख,ग मोडल अनुसार ३४ कित्ता देखी १०२ कित्ता सम्म स्थानीले तामाकोशीको सेयर पाउने भएका छन ।
उक्त मोडल अनुसार क बर्गकाले १०२ कित्ता, ख बर्गले ४८ र ग बर्गकाले ३० देखि ३४ कित्ता सम्म पाउने भएका छन । आयोजना प्रभावित दोलखाका स्थानीय बासिन्दाका लागि साधारण सेयर (आइपीओ) बिक्री गरेको ४ महीनापछि माथिल्लो तामाकोशी जलविद्युत आयोजनाले आज सेयर बाँडफाँड गर्ने भएको हो । गत साउन १६ गतेदेखि बिक्री खुला गरेको सेयर कम्पनीले ४ महीनापछि बाँडफाँड गर्न लागेको हो ।
आयोजनाले सेयर बाँडफाँड पछि आवेदकको बाँकी रकम ५ दिनभित्रै आवेदन भरेको खाता मार्फत नै फिर्ता हुने प्रवक्ता न्यौपानेले जानकारी दिएका छन ।
आयोजनाले सर्वसाधरणको लागि १५ गते देखि ४ दिनका लागि सेयर आवेदन खुल्ला गर्ने भएको छ । सर्वसाधरणको लागि १ करोड ५८ लाख ८५ हजार कित्ता सेयर विक्री गर्ने भएको हो ।
