काठमाडौं । भाटभटेनी सुपरमार्केटका अध्यक्ष मीनबहादुर गुरुङले दुर्गा प्रसाईँलाई गुण्डा नाइकेको संज्ञा दिएका छन् । राजावादी आन्दोलनका क्रममा गत शुक्रबार कोटेश्वस्थित भाटभटेनीमा भएको लुटपाट रोक्न भूमिका निर्वाह गरेका आफ्ना कर्मचारीहरुको सम्मान कार्यक्रममा बोल्दै उनले गुण्डा प्रसाईँलाई छाडा गुण्डा र गुण्डाहरुको नाइके भएको बताएका हुन् । गुरुङले गएको हप्ता शुक्रबार घटेको घटनालाई निन्दनीय भएको बताउँदै राजावादी नामको अराजक समूहले भाटभटेनीलगायत निजी क्षेत्रमाथि आक्रमण गरेको जस्तो हिंसात्मक आन्दोलन हालसम्म नदेखेको बताए ।
‘मैले पञ्चायत पनि भोगेँ, पञ्चायतकालमा भएको आन्दोलनको प्रत्यक्षदर्शी पनि हुँ, २०६१/६२ को आन्दोलन पनि देखेँ,’ उनले भने, ‘तर, त्यसबेला निजी क्षेत्रमाथि आक्रमण भएको देखिन, जस्तो यसपटक भयो ।’ उनले व्यवसायीमाथि भइरहेको आक्रमणबारे सरकारलाई कडा कदम चाल्न आग्रह गरे ।
‘आज भाटभटेनी लुटियो, भोलि सबै व्यवसायी लुटिन सक्छन् । यस्तो घटनाले देशकै व्यवसायी पलायन हुन सक्छन्,’ उनले भने । उनले व्यवसायीहरूलाई सुरक्षित बनाउन राज्यले तत्काल कदम चाल्नुपर्ने भन्दै सरकारमाथि प्रश्न उठाए । उनले कार्यक्रममा सरकारले नै गुण्डा प्रवृत्तिलाई बेलैमा पहिचान गरी सोहीअनुसार कडा कदम लिनुपर्नेमा सरकारको कमजोरीले अहिले यस्तो प्रवृत्ति झन उद्दण्ड भएको बताए ।
गुरुङले समाजमा विभाजन ल्याउने गलत प्रवृत्तिको आलोचना गर्दै मारवाडीहरू पनि यस देशका नागरिक भएको बताए । केहिले मारवाडीहरुलाई देशको नागरिक नै नभएको बताउँदै उनीहरुलाई पलायनका लागि उक्साइरहेको बताए । ‘के मारवाडीहरु नेपाली होइनन्, उनीहरुलाई भगाएर देश कंगाल बनाउने ?,’ उनले प्रश्न गरे, ‘मारवाडीहरु नेपाली नै होइनन् भन्ने मिथ्या सिर्जना गर्नेलाई सरकारले ध्यानमा राख्नुपर्दैन ?’ उनले हालै भएका हिंसात्मक घटनामा संलग्नलाई कारबाहीको माग गर्दै राज्यले एउटा डनलाई जे पनि गर्न, जे पनि भन्न छुट दिएको बताए । ‘दुर्गा प्रसाईं गुण्डा नाइके हो,’ उनले भने, ‘यिनका यस्ता गतिविधिले राजसंस्था फर्किँदैन ।’
गुरुङले भाटभटेनी सुपरमार्केटको पुनर्निर्माणमा कुनै असर बाँकी नराखेकाे बताउँदै २४ घण्टाभित्र भाटभटेनी पुनः बनाउने क्षमता कर्मचारीमा रहेको बताए । व्यवसायीहरूमाथि बढ्दै गएको आक्रमणप्रति सरकार गम्भीर हुनुपर्ने भन्दै गुरुङले सरकारले डनहरूको संरक्षण गर्ने होइन, व्यवसायीलाई सुरक्षित राख्ने नीति अवलम्बन गर्नुपर्नेमा जोड दिए । भाटभटेनी सुपरमार्केटमाथिको आक्रमण र त्यसको असरबारे सरकारले चाँडै निर्णय नगरे, देशकै व्यवसायिक क्षेत्र संकटमा पर्ने उनको चेतावनी छ । कार्यक्रममा भाटभटेनीका प्रमुख कार्यकारी अधिकृत (सीईओ) पानु पौडेलले घटनाप्रति गहिरो दुःख क्षतिबाट छोटो समयमै बाहिर निस्कन सक्षम भएको बताए । तर अहिले पनि व्यवसायीमाथि शंका र डर व्याप्त रहेको बताउँदै उनले यसअघि हालसम्म भएका ठूला आन्दोलनहरूमा व्यवसायीमाथि यस्तो व्यवहार नभएको र यसपटक यस्तो भएको बताए । उनले सरकारले व्यवसायी र कर्मचारीको सुरक्षामा विशेष ध्यान दिनुपर्ने बताए ।
गुरुङले सामाजिक उत्तरदायित्वअन्तर्गत बाढीपहिरो, भूकम्प, कोरोना जस्ता विपत्तिमा भाटभटेनीले उल्लेखनीय योगदान गरेको उल्लेख गरे । ‘त्यति हुँदाहुँदै पनि हामीमाथि अन्याय भयो,’ उनले भने, ‘यस्ता कुकर्ममा संलग्नहरूमाथि कारबाही हुनुपर्छ, सरकारले यस्तो काम गर्नेलाई तुरन्त पहिचान गरी पक्राउ गरोस् ।’ गत शुक्रबार राजावादी आन्दोलनकारीहरुले भाटभटेनीमा लुटपाट मच्चाएका थिए । उक्त लुटपाटमा कुल क्षति करिव ८० लाख रुपैयाँ भएको भाटभटेनीले जानकारी दिएको छ । शुक्रबारको लुटपाटमा ६४ लाख ८८ हजार ३३७ रुपैयाँ बराबरको सामग्री लुटपाट भएको छ । राजावादी समूहले गरेको आन्दोलनमा उनीहरुका कार्यकर्ता प्रवेश गरेर भाटभटेनी तोडफोड गर्नुका साथै लुटपाट गरेका थिए ।
त्यसैगरी भाटभटेनीका बाहिरी भागमा रहेका धेरैजसो सिसा फुटेका थिए । भवनमा क्षति पुगेको थियो । त्यसबापत ११ लाख ८५ हजार ८५५ रुपैयाँको क्षति भएको भाटभटेनीको प्रारम्भिक अनुमान छ । त्यसैगरी दुई लाख ६५ हजार रुपैयाँका शो–केश तथा अन्य सामग्रीमा क्षति पुगेको छ । काउन्टरमा रहेका ९४ हजार रुपैयाँ पनि लुटपाट गरिएको भाटभटेनीले जानकारी दिएको छ । यसरी तोडफोड र लुटपाट भएको भाटभटेनी त्यसको भोलीपल्ट नै जस्ताको त्यस्तैरुपमा पुनः निर्माण भइसकेको थियो । जसको श्रेय कर्मचारीहरुलाई जाने भन्दै आज भाटभटेनीले आफ्ना सुरक्षा गार्डसहित दर्जनौं कर्मचारीलाई सम्मान गरेको हो ।
