काठमाडौं । नेपालको होटल व्यवसायमा विदेशी चेन ब्राण्डको प्रभुत्व बढ्दै जाँदा आईएमई ग्रूपले भने आफ्नै ब्राण्ड ‘इला’लाई चेनको रुपमा स्थापित गरेको छ । पछिल्लो समय हस्पिटालिटी क्षेत्रमा प्रवेश गरेको आईएमईले आफ्नो होल्डिङ्स कम्पनी आईएमई हस्पिटालिटीअन्तर्गत ‘इला’ लाई स्थापित स्वदेशी ब्राण्डको रुपमा अघि बढाएको छ ।
बैंक, वित्त तथा रेमिटान्सलगायत दर्जनौं व्यवसायमा स्थापित आईएमई ग्रुप पछिल्लो समय पर्यटन उद्योगमा पनि स्थापित भएको छ । केबलकार र होटल व्यवसायलाई सँगसँगै अघि बढाएको सो ग्रुपले विदेशी चेन ब्राण्डलाई टक्कर दिँदै ‘इला’ लाई स्थापित गरेको हो । शुरुमा चन्द्रगिरी केबलकार एण्ड बुटिक होटलबाट पर्यटन क्षेत्रमा प्रवेश गरेको सो ग्रुपले पोखरा र काठमाडौंमा अन्य नामबाट होटल संचालन गर्दै आएको थियो । तर, पछिल्लो समय आफ्नै छुट्टै ब्राण्ड स्थापित गर्दै बागलुङको तीन तारे होटलबाट ‘इला’लाई नेपाली चेन ब्राण्डको रुपमा अघि बढाएको हो । केही समयअघि बागलुङमा होटल इला संचालनमा ल्याएको आईएमई ग्रुपले नयाँ वर्ष २०८२ को शुरुवातसँगै मौलाकालिकामा दोस्रो चेन होटलको रुपमा इला संचालनमा ल्याउने भएको छ ।
नेपालमा मात्रै नभई विदेशमा समेत स्वदेशी चेन ब्राण्डलाई स्थापित गराउने गरी होटल इला संचालनमा ल्याइएको नेपाल उद्योग वाणिज्य महासंघका अध्यक्ष एवं आईएमई ग्रुपका कार्यकारी अध्यक्ष चन्द्रप्रसाद ढकालले जानकारी दिए । ‘हामीले इलालाई एक स्थापित ब्राण्डको रुपमा अघि बढाउने छौं,’ उनले भने, ‘इलाले आईएमई ग्रुपअन्तर्गत बनेका मात्र नभई अन्य होटलको पनि व्यवस्थापन सम्हाल्ने छ ।’ पछिल्लो समय फ्रेन्चाईज चेन ब्राण्डको रुपमा नेपालबाट पैसा विदेशिने क्रम बढ्दो छ । तर स्वदेशी ब्राण्ड इलाले त्यसलाई समेत रोक्ने छ । अहिले होटल व्यवसायमा फ्रेञ्चाईजको नाममा कारोबारको न्यूनतम ५ प्रतिशतदेखि १० प्रतिशतसम्म रकम विदेशिइरहेको छ । तर, स्वदेशी ब्राण्डलाई नै फ्रेञ्चाईजको रुपमा अघि बढाउँदा उक्त रकम स्वदेशमा नै बस्ने छ ।
नेपाल घुम्न आउने विदेशी पर्यटकलाई नेपाली ब्राण्ड छुट्टै अनुभव दिलाउने उद्देश्यअनुरुप इलालाई अघि बढाइएको आईएमई हस्पिटालिटीका अध्यक्ष सचिन ढकालले बताए । ‘कुनै पनि विदेशी पर्यटक नेपाल घुम्न आउँदा उनीहरुलाई ‘इला’को उत्कृष्ट सेवा र अनुभव दिलाउने हाम्रो उद्देश्य हो,’ उनले भने, ‘सोही अनुरुप हामीले खोल्ने सबै होटल तथा केवलकारमा पर्यटक लक्षित ‘इला एक्सपेरियन्स’को मोडालिटीमा अघि बढेका छौं ।’
आईएमई हस्पिटालिटीले हिमाल, पहाड र तराईको भावनालाई कदर गर्दै ‘इला’ ब्राण्डलाई फ्रेञ्चाईज मोडलमा अघि बढाएको समेत ढकालले जानकारी दिए । ‘इला संस्कृत शब्द हो र यसले पृथ्वी (अर्थ) भन्ने बुझाउँछ,’ उनले भने, ‘तसर्थ हामीले नेपालको सबै भौगोलिक अवस्था र वनावटलाई समेटने गरि ‘इला’ ब्राण्ड संचालनमा ल्याएका हौं ।’ ढकालका अनुसार इलालाई इला र इला कम्फर्ट गरी दुई ब्राण्डमा संचालनमा ल्याइने छ । लक्जरी होटललाई इला र बजेट होटललाई इला कम्फर्टको ब्राण्डबाट संचालन गरिने छ ।
आईएमई हस्पिटालिटीको नेपालका सबैजसो भुभागमा गरी एक दर्जन भन्दा बढी होटल निर्माण चरणमा रहेको र ती सबै होटल इलाकै ब्राण्डमा संचालनमा ल्याईने उनले बताए । आईएमई हस्पिटालिटीले बुटवलमा रहेको कामाख्या, काठमाडौंमा रहेको ेले हिमालय र पोखराको वाटर फ्रण्टलाई समेत इला ब्राण्डमा संचालनमा ल्याउने छ । ‘हाम्रो उद्देश्य आफुले संचालन गरेका मात्र नभई स्वदेश तथा विदेशमा समेत इलालाई फ्रेञ्चाईजको रुपमा विस्तार गरी व्यवस्थापन सम्हाल्ने हो,’ सचिन ढकालले भने, ‘तर, सोभन्दा अघि आफुअन्तरगतका होटलमा विश्वसनीय गुणस्तरीय सेवा दिएपछि मात्रै अन्य होटलमा व्यवस्थापन सम्हाल्ने छौं ।’
